“Demokratiyanın təməli olan müstəqil mətbuatın yox edilməsi, jurnalistlərin kütləvi həbsi məhz Azərbaycan xalqına verilən “Sus” mesajıdır. Bu cinayət hamımıza qarşı işlənilir”.

Bu sözlər 3 May – Beynəlxalq Mətbuat Azadlığı Günü ərəfəsində həbsdə olan “Meydan TV” əməkdaşlarının ictimaiyyətə ünvanladığı müraciətdəndir. Ötən ilin dekabrından “Meydan TV”nin Bakıdakı əməkdaşları qaçaqmalçılıq ittihamı ilə həbs edilib və 10 nəfərə qarşı cinayət işi açılıb. Hazırda istintaq təcridxanalarında saxlanılan jurnalistlər bu günü tikanlı məftillər arxasında qeyd etdiyini söyləyir və mətbuat azadlığı uğrunda cəmiyyəti səssiz qalmamağa çağırır.

“Məqsəd və missiyası xalqla iqtidar arasında körpü rolunu oynayan, hakimiyyəti təşviq, gizlinləri ifşa edən müstəqil medianın sıradan çıxarılması xalqla hakimiyyəti üz-üzə qoyub. Bu səbəbdən yerli mediaya qaz, yol kimi məişət problemlərini işıqlandırmaq icazəsi verilsə də, sosial ədalətsizlik, hüquq-mühafizə orqanlarında baş verən qanunsuzluqlar, məhkəmə sistemində yarıtmazlıq gözardı edilir. Baş verən haqsızlıqları “xalça altına ötürən” hökumət hələ anlamır ki, bir gün üfunət iyindən özü boğulacaq. Buna inanmayan və gücünə güvənən İlham Əliyev onu unudur ki, heç bir xof xalqın səsini batıra bilməz və müvəqqəti sükut heç də firavanlığın, razılığın göstəricisi deyil”.

“Meydan TV” əməkdaşları jurnalistlərin həbsi, xarici mediaların fəaliyyəti məhdudlaşdırıldıqdan sonra ölkənin “tezislərlə fəaliyyət göstərən cib mediasının” ümidinə qaldığını deyir.

“İstintaq materialları rahatlıqla dərc edilir”, deyə bəyanatda yazılıb.

“Bütün hüquqları əlindən alınan, görməzdən gəlinən Azərbaycan xalqı bilsin ki, həqiqəti göstərmək, iqtidarın korrupsiya cinayətlərini, qanunsuzluqlarını üzə çıxarmaq üçün həbsxanada dirənən jurnalistlər var”,- deyən “Meydan TV” əməkdaşları həbs olunmaqlarının səslərinin susdurulması ilə nəticələnməyəcəyini qeyd edib.
"Meydan TV"nin həbsdə olan jurnalistləri Beynəlxalq Mətbuat Azadlığı günü ilə bağlı çağırış edib.

“3 May Beynəlxalq Mətbuat Azadlığı günüdür. Biz bu günü tikanlı məftillər arxasında qeyd edir, qapalı kameralarımızdan ölkəmizə və beynəlxalq aləmə səslənirik: Varlığımızla, fəaliyyətimizlə bütün basqıcı rejimlərə meydan oxumağa davam edirik. Bizi həbsxanaya salıb susdurduğunu zənn edənlər, həbsxananın özgürləşdirici gücündən xəbərsizdir. Daha heç bir narahatlıq yoxdur, həbs edilmişik, səsimiz buradan daha gur çıxacaq, daha çox duyulacaq.
Bu gün ölkə hakimiyyətinin müstəqil mediaya illərlə davam edən basqısı nəhayət öz nəticəsini verib və Azərbaycanda bir azad media nümunəsi belə qalmayıb. Müstəqil jurnalistlər həbs olunub və xarici mediaların nümayəndəlikləri ləğv edilib. Nəticədə ölkədə Prezident Administrasiyasının tezisləri ilə fəaliyyət göstərən cib mediası qalıb. Vəziyyət o həddədir ki, jurnalistlərin məhkəmələrdən hazırladıqları materiallar DTX-nın əməkdaşının redaktəsindən sonra dərc edilir. “Baku TV”, “Real TV” kimi özünü xalqın mediası kimi qələmə verənlər ifşa və təhdid dilini seçir. Vətəndaş cəmiyyətinin təqib və həbs xəbərləri tərəf olaraq paylaşılır.

İstintaq materialları rahatlıqla dərc edilir. Bəli, artıq həmin medialar bariz formada hakimiyyətin silkələnən barmağı rolunu oynayır. Məqsəd və missiyası xalqla iqtidar arasında körpü rolunu oynayan, hakimiyyəti təşviq, gizlinləri ifşa edən müstəqil medianın sıradan çıxarılması xalqla hakimiyyəti üz-üzə qoyub. Bu səbəbdən yerli mediaya qaz, yol kimi məişət problemlərini işıqlandırmaq icazəsi verilsə də, sosial ədalətsizlik, hüquq-mühafizə orqanlarında baş verən qanunsuzluqlar, məhkəmə sistemində yarıtmazlıq gözardı edilir. Baş verən haqsızlıqları “xalça altına ötürən” hökumət hələ anlamır ki, bir gün üfunət iyindən özü boğulacaq. Buna inanmayan və gücünə güvənən İlham Əliyev onu unudur ki, heç bir xof xalqın səsini batıra bilməz və müvəqqəti sükut heç də firavanlığın, razılığın göstəricisi deyil. Demokratiyanın təməli olan müstəqil mətbuatın yox edilməsi, jurnalistlərin kütləvi həbsi, məhz Azərbaycan xalqına verilən “Sus” mesajıdır. Bu cinayət hamımıza qarşı işlənilir. Bütün hüquqları əlindən alınan, görməzdən gəlinən Azərbaycan xalqı bilsin ki, həqiqəti göstərmək, iqtidarın korrupsiya cinayətlərini, qanunsuzluqlarını üzə çıxarmaq üçün həbsxanada dirənən jurnalistlər var!

Biz ifadə azadlığını qəsb edənlərin məhbusları, beynəlxalq təşkilatlara, söz azadlığının keşiyində duranlara çağırış edirik! Müharibələrlə çalxalanan dünyada ifadə azadlığının boğulmasını gözardı etməyin. Əks halda diktatorların əzdiyi cəmiyyətlərin dairəsi genişlənəcək! Biz – İstintaq Təcridxanasının az qala hər “qarmoşka”sından boylanan jurnalistlər haqqımız olan azadlığımızı tələb edirik!”.

Aynur Elgünəş (Qənbərova)
Şəmşad Ağa
Ramin Deko (Cəbrayılzadə)
Natiq Cavadlı
Ülvi Tahirov
Aytac Tapdıq (Əhmədova)
Xəyalə Ağayeva
Aysel Umudova
Fatimə Mövlamlı
Nurlan Libre (Qəhrəmanlı)