Sentyabrın 29-da, səhər saat 7.30-da yaşadığı mənzilə girən cinayətkarlar siyasi mühacir, azərbaycanlı dissident Vidadi İsgəndərliyə 21 bıçaq zərbəsi vurdular. Oktyabrın 1-də, o, Milhouse hospitalında öldü.

Bu, Azərbaycan diktatorunun göstərişi ilə həyata keçirilən bir sui- qəsd hadisəsidir...

Avropa siyasi dissidentlər- mühacirlər üçün təhlükəli yerə çevrilir. Xüsusilə Fransa. Biz müxtəlif zamanlarda Putinin, İlham Əliyevin, hətta Ramzan Kadırovun Almaniyada və ya Fransada cəza əməliyyatlarını həyata keçirdiyi barədə xəbərləri eşidirik. Dünyanın neft pulları ilə azğınlaşmış diktaturaları ölkədən qaçmağa məcbur olmuş dissidentləri yaxalayıb susdurmağı bacarırlar. Əlbəttə, ölümlə cəzalandırmaq son həddir. Amma yalnız bu deyil axı. Öldürməyə qədər də həyata keçirdikləri tədbirlər var. Avropa ölkələrində şaxələndirdikləri “diaspor təşkilatları” faktiki olaraq Azərbaycanın cəza orqanlarının xaricdəki uzantısıdır. Onlar xəbər toplayırlar, “narahat dissident”lərin ünvanlarını dəqiqləşdirirlər, döyürlər, qorxudurlar. Mən qətiyyən şübhə etmirəm və bilirəm ki, siyasi mühacirlər bu cür faktlarla bağlı müxtəlif Avropa ölkələrində polisə müraciət edirlər. Amma hər zaman da buna bənzər cavab alırlar ki, “axı, sizi öldürməyiblər”.

Bu dissident mühacirlər öz ölkələrində təqib edilməyin necə olduğunu bilirlər, qorxu içində yaşamağın nə olduğunu bilirlər. Hətta öldürülməyin də necə olduğunu bilirlər. Azərbaycanda 2003- cü ildən üzü bəri siyasi qətllərin sayı onlarladır. Siyasi həbslərin sayı minlərlədir.

Amma siz əminsizmi ki, bu diktatorlar cəzasız qaldıqca, ifşa edilmədikcə öz ölkələrindən qovulan siyasi mühacirləri susdurmaqla kifayətlənəcəklər? Mən şəxsən əmin deyiləm. Günün birində eşidəcəksiz ki, onlar Avropada jurnalistləri döyürlər, öldürürlər, siyasətçiləri şantaj edirlər və ya elə onları da döyüb- öldürürlər... Dafne Qaliziya olayı dərs olmadımı?
Kürü diplomatiyasının toruna düşüb siyasətdən qovulan deputatların, başqa siyasətçilərin nümunəsi dərs olmadımı? Əminsizmi ki, sizin siyasətçilərinizi öldürməyəcəklər? Cinayətkar diktaturalar sizin siyasətçilərinizi rüşvətlə ala bildikləri kimi, kriminal elementlərə də rüşvət verib onları öldürə də bilərlər. Nəzərə alın ki, dağılmış Sovet İttifaqı coğafiyasının kriminal aləmi indi həmin coğrafiyada olan diktatorların sərəncamı altındadır, onların göstərişləri ilə hərəkət edirlər.

Avropa ölkələrinin, o cümlədən Fransanın polisi bu cinayəıt hadisəsini araşdırıb qatilləri aşkara çıxara bilməsə, bu artıq dövlətin şərəf məsələsinə çevrilmiş bir qanlı hadisənin seriala çevrilməsi üçün başlanğıc olacaqdır.
Məqaləni Fransız dilində buradan oxumaq mümkündür.