Mayın 3-də Azərbaycan Respublikasının Prezidenti İlham Əliyev və birinci xanım Mehriban Əliyeva Moskvanın və Bütün Rusiyanın Patriarxı Kirill ilə görüşüblər.

Dövlət başçısı və birinci xanım qonağı səmimiyyətlə qarşılayıblar.

Görüş zamanı Patriarx Kirillin Azərbaycana əvvəlki səfərləri və ölkə rəhbərliyi ilə keçirilmiş görüşləri məmnunluqla xatırlanıb. Azərbaycanda hökm sürən multikultural və dini tolerantlıq mühiti, müxtəlif dinlərin nümayəndələrinin ölkədə sülh və harmoniya şəraitində yaşaması xüsusi vurğulanıb. Bu kontekstdə pravoslav xristian icmasına göstərilən diqqət və qayğı, həmçinin həmin icmanın nümayəndələrinin Azərbaycanın ictimai-siyasi və mədəni həyatında fəal iştirakı qeyd olunub.

Bildirilib ki, dini tolerantlığın təmin olunması Azərbaycanın dövlət siyasətinin əsas istiqamətlərindən biridir və bu, xalqımızın əsrlər boyu formalaşmış həyat tərzinin ayrılmaz hissəsidir.

Görüş çərçivəsində Patriarx Kirill Rus Pravoslav Kilsəsinin I dərəcəli “Müqəddəs Knyaginya Olqa” ordenini Azərbaycanın Birinci vitse-prezidenti və Heydər Əliyev Fondunun prezidenti Mehriban Əliyevaya təqdim edib. Orden, cəmiyyətdə ənənəvi dəyərlərin qorunub saxlanması, mədəniyyətlərarası və dinlərarası dialoqun inkişafına verdiyi töhfələrə görə Patriarx Kirillin fərmanı ilə təqdim olunub.

Birinci xanım Mehriban Əliyeva göstərilən bu yüksək diqqətə görə təşəkkürünü bildirib.