Mayın 8-də Binəqədi Rayon Məhkəməsinin qərarı ilə yeni yaradılmış “Yoldaş Media” platformasının rəhbəri və ictimai fəal Əhməd Məmmədli barəsində 4 aylıq həbs qətimkan tədbiri seçilib. Məhkəmə qərarı jurnalistin Cinayət Məcəlləsinin 126-cı maddəsi (qəsdən sağlamlığa ağır zərər vurma) ilə ittiham olunması əsasında çıxarılıb.

Əhməd Məmmədli məhkəmə zalına gətirilərkən jurnalistlərə və ictimaiyyət nümayəndələrinə səslənərək, səsini ucaldıb:
“Yoldaş Media ilə bağlı həbs olunmuşam! Azad media susdurula bilməz!” – deyə bildirib.

İttihamın detalları

Daxili İşlər Nazirliyinin rəsmi məlumatına görə, Əhməd Məmmədli mayın 6-da axşam saatlarında Biləcəri qəsəbəsində baş verən bıçaqlanma hadisəsi ilə əlaqədar saxlanılıb. Bildirilir ki, hadisə R. İsmayılov küçəsində baş verib. Mübahisə nəticəsində Vüqar Dünyamalıyev adlı şəxsə qarın nahiyəsindən bıçaqla xəsarətlər yetirilib. Hadisəni törətməkdə şübhəli bilinən şəxsin Cəlilabad rayonunda anadan olmuş Əhməd Məmmədli olduğu müəyyən edilib və dərhal saxlanılıb.

Faktla bağlı Binəqədi Rayon Polis İdarəsində araşdırma aparılır. Cinayət işi başlanıb və istintaq davam etdirilir.

Yaxınları: “Bu qurama işdir”

Əhməd Məmmədlini tanıyan şəxslər və ictimai fəallar onun saxlanılmasının siyasi sifariş olduğunu iddia edir. Onların sözlərinə görə, jurnalist heç bir mübahisə yaratmayıb, əksinə, evinə qayıdarkən hücuma məruz qalıb: “Əhməd deyir ki, bu qurama işdir. Onu özləri döyüblər. İndi vəziyyəti də pisdir, hələ də bədəni ağrıyır. Jurnalistika fəaliyyəti və “Yoldaş Media”nın son vaxtlar yayımladığı tənqidi materiallara görə onun hədəfə alındığını düşünürük”, – deyə fəalın yaxınlarından biri bildirib.

İctimai reaksiya və narahatlıqlar

Əhməd Məmmədlinin həbsi sosial şəbəkələrdə və bəzi müstəqil media orqanlarında ciddi narahatlıqla qarşılanıb. Onlar bu hadisəni ölkədə azad medianın boğulması və ictimai fəalların susdurulması kimi qiymətləndirirlər. Bir çox insan hüquqları müdafiəçisi bu həbsi siyasi motivli qərar kimi görür və şəffaf istintaq tələb edir.

Hazırda Əhməd Məmmədli barəsində istintaq davam edir. Onun yaxınları və tərəfdarları isə işin obyektiv aparılmasını, jurnalistin səhhətinə nəzarət olunmasını və hüquqlarının tam təmin edilməsini tələb edirlər.

Əlavə məlumat verildikcə xəbər yenilənəcək.