Jurnalist Xalq yazıçısı, Azərbaycan Yazıçılar Birliyinin birinci katibi Çingiz Abdullayevdən soruşub ki, bir qurultay üçün dövlət büdcəsindən ayrılmış 203 000 manat çox deyil?

O da jurnalistə "utanmırsan bu sualı soruşursan? ölmürsən?" deyib.

"Bu qədər adama bilet almışıq. Buranın icarə haqqını ödəmişik. Onları mehmanxanaya yerləşdirmişik, kitab çap eləmişik. Bəs siz bilmirsiniz? Bu sözü məndən soruşmağa utanmırsınız? Gəlib neçə gündür burada qalanların mehmanxana pulu, yeyib-içmək pulu, rayonlardan gələnlərin yolpulu... İçəri girəndə posterlərə baxmamısız? Başa düşürsünüz? Utanmırsınız, Xalq yazıçısından soruşursunuz pullar hanı? Ölmürsən?"

Çingiz müəllim, Xalq yazıçısının bir jurnalistin dövlət büdcəsindən nəticəsi əvvəldən bəlli olan bir tədbirə 203 000 manat ayrılmasını sorğulamasına görə "utanmırsan, ölmürsən?" deməyindən utanmalısınız.

Jurnalistin işi sorğulamaqdır, sual verməkdir. Görünür, istəyirsiniz ki, illərlə eyni vəzifədə oturasınız, basıb dövlət büdcəsini dədə malı kimi yeyəsiniz, evlər, villalar, bağlar alasınız, övladlarınızı vəzifələrə dürtüşdürəsiniz, heç kim də sizə sual verib narahat etməsin.

Sizin utanacağınız başqa məsələlər də var, ictimaiyyət bilməsə də, özünüz və yeyib-içdiyiniz yaxın ətrafınız bilir. Amma siz jurnalistə dövlət büdcəsindən qurultaya ayrılmış vəsaitlə bağlı sual verdiyinə görə "ölmürsən?" deyirsiniz.

Ey xalq yazıçısı, zəhmət çək sadaladıqlarının hesabatını ver.