AMEA Prezidentinin sabiq köməkçisi və Prezident Katibliyinin keçmiş rəisi Eldar Əmirov barəsində 4 ay müddətinə həbs qətimkan tədbiri seçilib. Qərar Səbail Rayon Məhkəməsi tərəfindən verilib.

İlkin məlumatlara görə, Əmirov Prezident Administrasiyasının sabiq rəhbəri Ramiz Mehdiyevin ən yaxın çevrəsində yer alıb və onun “sağ əli” kimi tanınıb.

Ramiz Mehdiyevin kölgəsində yüksəliş

“Müəllifliyi” Mehdiyevə aid edilən bir çox kitab və məqalələrin əslində Eldar Əmirov tərəfindən yazıldığı bildirilir. Onların arasında “Tarixi idrakın elmiliyi problemlərinə dair” (2015) və “Dünya nizamından nizamsızlığa doğru” kimi əsərlər də var.

2019-cu ildə Ramiz Mehdiyev AMEA-ya prezident təyin olunduqdan sonra, Eldar Əmirova da Akademiyada yüksək vəzifə verilib — o, AMEA Prezidentinin Katibliyinin rəisi vəzifəsinə gətirilib. Həmin dövrdə Akademiyanın idarəçiliyində əsas söz sahibi kimi məhz Əmirovun adı çəkilirdi.

İntizam pozuntuları və vəzifədən azad edilmə

Eldar Əmirovun adı daha əvvəl də qalmaqallarda hallanıb.
2022-ci ilin fevralında o, polis əməkdaşının qanuni tələbinə tabe olmamaqda ittiham edilərək 30 sutka inzibati qaydada həbs edilib. Həmin ilin aprelində isə AMEA-dakı vəzifəsindən azad olunub.

Eldar Əmirov haqqında qısa məlumat
• Yaşı: 40
• Əslən: Ağdam rayonundandır
• Təhsili: Siyasi elmlər üzrə fəlsəfə doktoru
• Keçmiş vəzifələri:
• Prezident Administrasiyasında Ramiz Mehdiyevin köməkçisi
• AMEA Prezident Katibliyinin rəisi

Hazırda onun Ramiz Mehdiyevlə eyni cinayət işi çərçivəsində dindirildiyi və AMEA-da yol verilmiş maliyyə və korrupsiya pozuntularında adı keçdiyi bildirilir.