Azərbaycanlı konfliktoloqlar və ekspertlər növbəti dəfə Ermənistana səfər ediblər.
Noyabrın 4-də Yerevanda dövlət nəzdində fəaliyyət göstərən “Orbeli” Mərkəzinin təşkilatçılığı ilə “Sülhün Qurulması və Çoxtərəfli Əməkdaşlıq” adlı beynəlxalq konfrans keçirilib. Tədbirdə 16 ölkədən 50-yə yaxın ekspert iştirak edib.

Azərbaycanı tədbirdə Topçubaşov Mərkəzinin direktoru Rusif Hüseynov və “Carnegie” Rusiya Avrasiya Mərkəzinin tədqiqatçısı Zaur Şiriyev təmsil ediblər.

Konfransın açılışında Ermənistanın baş naziri Nikol Paşinyan çıxış edib. Azərbaycanlı ekspertlər isə müxtəlif panellərdə çıxış edərək regionda sülh və əməkdaşlıq perspektivlərinə dair fikirlərini bölüşüblər.

Zaur Şiriyev çıxışında bildirib ki, region xalqları maksimalist yanaşmalardan çəkinməli və reallıqlara əsaslanmalıdırlar:

“Biz maksimalist mövqelərdən çəkinməli və gözləntilərimizi nə şişirtməli, nə də azaltmalıyıq. Realist olmalıyıq. Həyatda bütün qonşularımızı sevməsək də, onlara yardım üçün müraciət edirik və onları dəstəkləyirik. Düşüncə tərzində dəyişiklik lazımdır.”

O əlavə edib ki, qarşılıqlı səfərlər erməni və azərbaycanlı cəmiyyətlər arasında münasibətlərin normallaşmasına kömək edə bilər:

“Ekspert qrupları hökumətlərə gələcək üçün yol xəritəsi hazırlamaqda və ictimai rəyi anlamaqda kömək edə bilər. Jurnalistlər isə iki ölkə mediasında ritorikanın normallaşmasına töhfə verə bilərlər.”

Rusif Hüseynovun iştirak etdiyi paneldə isə Cənubi Qafqazda iqtisadi əməkdaşlıq məsələləri müzakirə olunub. O qeyd edib ki, “3+3” formatı kimi regional platformalar əməkdaşlığın təşviqi baxımından mühüm əhəmiyyət daşıyır:

“Müəyyən səbəblərə görə ‘3+3’ formatı tam şəkildə işləməyib, amma onun gələcəyi üçün imkanlar hələ də var. Ən vacibi, Cənubi Qafqazın üç respublikasının ahəngdar əməkdaşlığıdır.”

Bu, son 1,5 ayda azərbaycanlı ekspertlərin Ermənistana üçüncü səfəri olub.
Sentyabrın 22-də Topçubaşov Mərkəzinin direktor müavini Murad Muradov NATO Parlament Assambleyasının Rouz-Rot seminarında iştirak edib,
oktyabrın 22-də isə bir qrup QHT rəhbəri Yerevana səfər edib.

Həmin nümayəndə heyətində Fərhad Məmmədov, Rusif Hüseynov, Ramil İskəndərli, Dilarə Əfəndiyeva və Kəmalə Məmmədova yer alıblar.
Onlar səfər çərçivəsində Ermənistan Təhlükəsizlik Şurasının katibi Armen Qriqoryan və yerli ekspertlərlə görüşüblər.