Hesablama Palatası “Azərbaycan Televiziya və Radio Verilişləri” QSC-nin (“AzTV”) maliyyə fəaliyyətində ciddi qanun pozuntuları müəyyən edib.

Qurumun 2026-cı ilin dövlət büdcə layihəsinə verdiyi rəydə qeyd olunur ki, audit nəticəsində “AzTV” əməkdaşlarına ödənilməli olan maaşların “qonorar” adı ilə rəsmiləşdirildiyi üzə çıxıb.

Toplam 26 milyon manat təşkil edən vəsaitin:
• 11,3 milyonu – 2023-cü ildə,
• 11,6 milyonu – 2024-cü ildə,
• 3,1 milyonu – 2025-ci ilin ilk rübündə ödənilib.

Hesablama Palatası bu praktikanı “əmək münasibətlərinin mülki-hüquqi münasibətlər kimi yanlış təsnif edilməsi” kimi qiymətləndirib. Sənəddə vurğulanır ki, bu hal Əmək və Vergi Məcəllələrinin tələblərinə ziddir, nəticədə sosial ayırmalar tam şəkildə tutulmayıb və işçilərin sosial təminat hüquqları məhdudlaşıb.

Rəydə qeyd olunur:

“Bu hallar dövlət vəsaitlərinin idarə edilməsində ciddi maliyyə intizamı pozuntusu kimi qiymətləndirilməlidir və müvafiq tədbirlərin görülməsi zəruridir.”

“AzTV”-nin ictimaiyyətlə əlaqələr şöbəsi isə məsələ ilə bağlı bildirib ki, artıq qonorar sistemindən tam imtina və maaşların yalnız əməkhaqqı formasında ödənilməsi istiqamətində Hesablama Palatası ilə danışıqlar aparılır:

“Televiziya yaranandan bu yana həm maaş, həm də qonorar sistemi ilə fəaliyyət göstərib. Bu, əməkdaşların məhsuldarlığına təsir edirdi. Tam maaş sisteminə keçid standart ödəniş mexanizmini yaratsa da, işin keyfiyyətinə mənfi təsir göstərə bilər.”

Qurumun nümayəndəsi əlavə edib ki, tam maaş sisteminə keçid prosesi ötən ildən başlayıb və 2026-cı ildə tam başa çatdırılması planlaşdırılır.