“Azərbaycan Televiziya və Radio Verilişləri” Qapalı Səhmdar Cəmiyyətində (“AzTV”) 26 milyon manatlıq maliyyə pozuntusu ilə bağlı qalmaqal getdikcə böyüyür.

Xəbər verildiyi kimi, Hesablama Palatası “AzTV”-də dövlət vəsaitlərinin idarə olunması ilə bağlı ciddi nöqsanlar aşkarlayıb. Audit nəticələrinə görə, əmək müqaviləsi ilə işləyən əməkdaşlara ödənilməli olan maaşlar “qonorar” adı ilə rəsmiləşdirilib. Ümumi məbləğ 26 milyon manat təşkil edir: 2023-cü ildə 11,3 milyon, 2024-cü ildə 11,6 milyon, 2025-ci ilin ilk rübündə isə 3,1 milyon manat.

Palata qeyd edib ki, bu hal əmək münasibətlərinin mülki-hüquqi münasibətlər kimi səhv təsnif edilməsinə, sosial ayırmaların tam tutulmamasına və nəticədə işçilərin sosial təminat hüquqlarının məhdudlaşmasına səbəb olub.

Məsələ ictimaiyyət arasında da geniş rezonans doğurub. Ekspertlər və mediada yayılan məlumatlara görə, AzTV-dəki qonorar sistemi uzun müddətdir şəffaflıq problemləri yaradır. Bu sistem rəhbərliyə maliyyə vəsaitlərini subyektiv qaydada bölmək, bəzi şəxslərə yüksək məbləğli ödənişlər rəsmiləşdirmək imkanı verir.

Daha diqqətçəkən məqam isə AzTV-nin Maliyyə Departamentinin rəisi Aysel Əsədzadənin, sədrin köməkçisi və Müəllif Proqramları Departamentinin rəhbəri Həmidağa Əsədzadənin həyat yoldaşı olmasıdır. Müəllif proqramlarının yüksək qonorarla maliyyələşdirildiyi nəzərə alınarsa, bu, maraqlar toqquşması ehtimalını gündəmə gətirir.

Bundan başqa, Hesablama Palatasının əvvəlki illərdə apardığı yoxlamalarda da AzTV-də dövlət vəsaitlərinin təyinatı üzrə xərclənməməsi halları aşkarlanmışdı. Məsələn, Prezidentin 2019-cu ildə televiziya üçün ayırdığı 3 milyon manatlıq ehtiyat fondu vəsaitinin bir hissəsi dekorasiya və çəkiliş avadanlıqlarına yönəldilmişdi.

Hesablama Palatası sədri Vüqar Gülməmmədov 2024-cü ilin aprelində bildirib ki, aparılan son audit zamanı eyni layihənin bir podratçı tərəfindən iki fərqli şəxsə təqdim edildiyi müəyyən olunub və bu məsələ hüquq-mühafizə orqanlarına ötürülüb.

Hazırda cəmiyyətdə əsas sual budur: Baş Prokurorluq AzTV-də aşkarlanan maliyyə pozuntuları ilə bağlı araşdırma başlayacaqmı?

Baş prokuror Kamran Əliyevin ötən il verdiyi açıqlamada qeyd olunmuşdu ki, mediada yayılan hüquqpozmalar barədə məlumatlar əsasında artıq bir neçə cinayət işi başlanıb. Buna görə də ictimaiyyət AzTV ilə bağlı bu məlumatların da Korrupsiyaya Qarşı Mübarizə Baş İdarəsi tərəfindən araşdırılacağına ümid edir.

Hazırda nə AzTV rəhbərliyi, nə də Baş Prokurorluq bu məsələ ilə bağlı rəsmi açıqlama verməyib.