Seçki prosesinə qanunsuz müdaxilələrin qarşısını təkcə polis ala bilər.

Bunu açıqlamasında VI çağırış Milli Məclisin deputatı Vüqar İskəndərov deyib.

O, qarşıdan gələn parlament seçkiləri zamanı polisin gücləndirilmiş iş rejimində çalışmasının vətəndaşların xeyrinə olacağını bildirib:

“Seçkiqabağı təşviqat materialların yayılmasının, qanunsuz müdaxilələrin qarşısını təkcə polis ala bilər. Həmişə belə tədbirlərdə polis gücləndirilmiş iş rejimində çalışıb və çalışmalıdır. Amma bu o demək deyil ki, polis seçki qutusunun başında dayanacaq. Polisin özünün təhkim olunmuş yeri var və bu dünyanın hər yerində belədir”.

V.İskəndərov, bəzi resursların belə məsələləri hakimiyyətin seçki saxtakarlığı kimi qələmə verməsinin cəfəngiyat və absurd olduğunu söyləyib:

“Seçkiqabağı təşviqatın pozulması və bənzər halları Mərkəzi Seçki Komissiyası və digər qurumlar deyil, polis həll edir. Ona görə də buna dövlətin üzərinə düşən vəzifə kimi baxılmalıdır. Əksini düşünənlər xəstə təxəyyülü insanlardır. Seçkilərdə ayrılmış açıq və qapalı yerlərdən kənarda qanunsuz aksiyaların keçirilməsi, ictimai asayişin pozulması hallarını polis bütün qanuni, hüquqi vəzifələrini icra edərək aradan qaldırır. Ötən günlərdə Mərkəzi Seçki Komissiyasında keçirilən müşavirədə parlament seçkilərində dövlətin üzərinə düşən vəzifələr dairə seçki rəhbərləri ilə müzakirəsi, Prezident İlham Əliyevin köməkçisi, Zeynal Nağdəliyevin vəzifəli şəxslərə müraciəti dünya standartlarına uyğun, şəffaf, demokratik seçkilərin keçirilməsinə hesablanıb. Hər zaman olduğu kimi yenə seçkilər uğurlu şəkildə keçiriləcək”,- deyə V. İsgəndərov qeyd edib.

Hüquqşünas Əliməmməd Nuriyev isə bildirib ki, polis əməkdaşlarının gücləndirilmiş iş rejimində işləməkdə məqsədi təkcə seçki məntəqələrində deyil kənarda da baş verə biləcək qanunsuz müdaxilələrin qarşısını almaq, vətəndaşlar üçün mümkün olan hər bir şəraiti yaratmaq, seçki obyektlərinin təhlükəsizliyinin təmin etmək kimi məsələlərdə yardım etməkdir:

“Biz ölkəmizdə polisin fəaliyyətini 44 günlük Vətən müharibəsi, eləcə də pandemiya dövründə gördük. Onlar həm belə günlərdə, həm də bayram günlərində dayanmadan çalışırlar. Mühüm siyasi hadisələr zamanı isə Daxili İşlər Nazirliyinin əməkdaşlarının gərgin iş rejimində çalışması normal haldır. Bu dünyanın hər yerində belədir. Sentyabrın 1-də Azərbaycanda keçiriləcək növbədənkənar parlament seçkilərində vətəndaşların konstitusional hüququn təmin edilməsində polisin məsuliyyəti təbii ki, daha da artacaq. Çünki ictimai asayişin qorunması polisin müqəddəs borcudur”.

Ə.Nuriyev deyib ki, seçkilər vaxtı polisin gücləndirilmiş iş rejimində çalışmasını sadəcə alqışlamaq lazımdır:

“Fundamental konstitusional hüququmuzun icrası prosesində polisin fəaliyyətini alqışlamaq lazımdır. Buna qarşı çıxanlar seçkilər zamanı özbaşınalıq etmək istəyən xarici və daxili elementlərdir. Dərk etmək lazımdır ki, polis seçki zamanı vətəndaşların səsvermə prosesinə qarışmır, əksinə qanunvericilikdə göstərilmiş qaydada fəaliyyət göstərərək seçkilərdə baş verəcək xoşagəlməz halların qarşısını alır. Bəziləri müəyyən ənənəvi sifarişlə ilə Azərbaycandakı sabitliyi pozmaq istəyirlər”.

Qeyd edək ki, DİN müavini bir neçə gün əvvəl seçki nəticələri ilə bağlı etiraz edənlərə qarşı polis sərt addım atacağını bildirmişdi.

Mərkəzi Seçki Komissiyasında müşavirə keçirilib.
İclasda daxili işlər nazirinin müavini, polis general-leytenantı Oqtay Kərimov da çıxış edib.

O, hazır mətni üzündən oxuyub, bəri başdan ciddi biçimdə kəm biçib.

Nazir müavini çıxışında önə çəkib ki, "İnternet məkanının və sosial şəbəkələrin davamlı monitorinqi aparılacaq. Seçkilərin normal keçməsinə mane olmaq niyyəti daşıyan pozucu qüvvələr vaxtında müəyyən edilib, barələrində tədbir görüləcək."

Polis general-leytenantı deyib ki, "Seçki bitəndən sonra bülletenlər və protokollar polisin müşayiəti ilə aparılacaq. Qanunsuz aksiyaların, ictimai asayişin pozulması hallarının qarşısının alınması üçün bütün tədbirlər görüləcək.
Əlbəttə, Oqtay Kərimov təkcə DİN-nin iradəsini deyil, bütövlükdə hökumətin siyasi mövqeyini ifadə edib.
Təsdiqləyib ki, əslində Azərbaycanda seçkiləri MSK deyil, DİN keçirir.

Nazir müavininin sözügedən çıxışını hökumətin nəzarətində olan bəzi KİV-lər, eləcə də İctimai TV paylaşıb.
İndi görürəm ki, İctimai TV və media quruluşları nazir müavininin video çıxışını ilim-ilim itiriblər.
Çıxışın yazılı variantına isə "əl gəzdiriblər".
Əcaba, nə baş verib?

Yəqin PA-dan DİN-ə zəng gəlib...