USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Vəkil: “İki zəng və bir səfər Elnarə Qasımovanı cinayətkar etmir”
Bugün Bakı Ağır Cinayətlər Məhkəməsində jurnalist Elnarə Qasımovanın işi üzrə keçirilən prosesdə vəkil Günay İsmayılova müdafiə nitqi ilə çıxış edib. O bildirib ki, ittiham aktında göstərilən faktlar – cəmi iki telefon zəngi və bir səfər – onun müştərisini “mütəşəkkil cinayətkar dəstənin üzvü” kimi göstərmək üçün hüquqi əsas vermir.
“Elnarə Qasımova jurnalistdir. O, sadəcə olaraq, 2023-cü ilin oktyabrında ‘Abzas Media’dakı həmkarı Günay Vaqifqızı ilə iki dəfə telefonla danışıb və bir dəfə Gürcüstana səfər edib. Bu faktlar onun cinayət törətdiyini sübut etmir”, – deyə vəkil bildirib.
İsmayılovanın sözlərinə görə, Elnarə Qasımova “saxta sənəd hazırlanması”, “vergidən yayınma” və “qaçaqmalçılıq” kimi ittihamlarla üzləşsə də, bunları sübut edən konkret faktlar və sübutlar təqdim olunmayıb: “İttiham aktında konkret əməl göstərilmir, yalnız ümumi və hüquqi əsasdan məhrum cümlələrlə ‘cinayətkar dəstə’ ifadəsi yer alır.”
Vəkil həmçinin Avropa İnsan Hüquqları Məhkəməsinin presedental qərarlarına istinad edərək qeyd edib ki, ittihamın dəqiq və əsaslandırılmış olması hüququn əsas tələblərindən biridir: “AİHM-in İlkin Rüstəmzadə və Rəsul Cəfərov işlərində vurğulandığı kimi, şəxsin nə ilə günahlandırıldığını aydın şəkildə bilməsi onun müdafiə hüququnun təminidir. Lakin bu işdə belə bir aydınlıq yoxdur.”
Elnarə Qasımova 2023-cü ilin dekabrında “Abzas Media” işi çərçivəsində saxlanılıb. Jurnalistin yaxınları və hüquq müdafiəçiləri onun fəaliyyətinin tamamilə peşə çərçivəsində olduğunu bildirir, beynəlxalq təşkilatlar isə onun həbsini ifadə azadlığına qarşı təzyiq kimi qiymətləndirir.
