Noyabrın 26-da İstanbul Ağır Cəza Məhkəməsi tanınmış türkiyəli jurnalist Fatih Altaylı barəsində hökmünü açıqlayıb. Məhkəmə Altaylını Türkiyə Prezidenti Rəcəb Tayyip Ərdoğanı “təhdid etməkdə” təqsirli bilərək ona 4 il 2 ay həbs cəzası verib.

Hökm elan olunmazdan öncə son sözünü deyən jurnalist ittihamı qəbul etməyib. O bildirib ki, heç vaxt prezidentə qarşı təhdid xarakterli ifadə işlətməyib:

“Prezident niyə məndən qorxsun? Mən nə hər hansı təşkilatın üzvüyəm, nə də zorakı bir fəaliyyətim olub. Məncə, prezident qorxaq biri deyil. Burada həm mənə, həm də prezidentə qarşı haqsızlıq edilir. Prezident İsraillə dalaşıb, ‘Mossad’dan qorxmayıb, 15 iyulda çevriliş vaxtı İstanbula gəlib. Mən sözlərimdən sonra Prezidentin Mühafizə İdarəsinə soruşdum ki, prezidentin gündəliyində dəyişiklik olubmu? Olmayıb! Deməli, mən ciddi qəbul ediləcək bir şey deməmişəm”.

Fatih Altaylıya qarşı istintaq bu il iyunun 20-də öz “YouTube” kanalında səsləndirdiyi fikirlərlə bağlı başlanmışdı. Altaylı həmin çıxışında Osmanlı tarixində padşahların sui-qəsd və saray intriqalarının qurbanı olduğunu xatırladaraq bunları demişdi:

“Yaxın keçmişə yox, uzaq keçmişə baxın; bu millət padşahını boğmuş bir millətdir. Az şey deyil – öldürülən, sui-qəsdin qurbanı olan Osmanlı padşahları… Sui-qəsd deməyək, fitnə qurbanı olan, yaxud boğulan və ya intihar adı verilən Osmanlı padşahları…”

“YouTube”un Türkiyə seqmentində ən geniş izləyici kütləsinə sahib jurnalistlərdən biri olan Altaylının hüquq komandası qərardan apellyasiya şikayəti verəcək.