İranda etirazların davam etdiyi bir vaxtda ölkənin baş prokuroru Məhəmməd Mövahhedi Azad sərt və açıq təhdid xarakterli açıqlama ilə çıxış edib. O, etirazlarda iştirak edən və onlara dəstək verən şəxsləri “Allahın düşmənləri” — mohareb adlandıraraq, bu ittihamın ölüm cəzasına qədər aparıb çıxara biləcəyini bildirib.

Dövlət televiziyasında yayımlanan çıxışında baş prokuror vurğulayıb ki, etiraz aksiyalarında iştirak edənlərə və onları dəstəkləyənlərə qarşı “qanunun ən ağır maddələri” tətbiq olunacaq. Bu açıqlama faktiki olaraq etirazın özü ilə silahlı cinayət arasında heç bir fərq qoymayan yanaşmanı ortaya qoyur.

Qeyd edək ki, İran qanunvericiliyində “mohareb” — yəni “Allaha qarşı düşmənçilik” ittihamı ən ağır cinayətlərdən biri sayılır və edam cəzası ilə nəticələnə bilər. Bu maddənin siyasi etirazlara tətbiqi isə hüquqi deyil, açıq-aşkar siyasi təzyiq aləti kimi qiymətləndirilir.

Baş prokurorun açıqlaması fonunda, ölkədə etirazlara qarşı hüquqi çərçivədən çox, qorxu və cəza mexanizmlərinin işə salındığı açıq görünür. Bu isə İran hakimiyyətinin mövcud narazılıqlara dialoqla deyil, repressiya ilə cavab verdiyini bir daha nümayiş etdirir.