“Meydan TV işi” üzrə həbsdə saxlanılan jurnalist Nurlan Qəhrəmanlının (Libre) psixoloji vəziyyətinin ağır olduğu deyilir. Bu barədə Meydan TV-yə onun həyat yoldaşı Əsli Əlizadə məlumat verib.

Ə.Əlizadənin sözlərinə görə, Nurlan Libre dekabrın 22-də keçirilən məhkəmə iclasında qanunsuz həbslərə etiraz olaraq qollarını kəsib. Bundan sonra Penitensiar Xidmətin əməkdaşları onun qolunu arxadan qandallayaraq zorakılıqla cəzaçəkmə müəssisəsinə aparıblar. O, iki gün müddətinə karserdə saxlanılıb.

Əsli Əlizadə bildirib ki, bu gün Nurlan Libre ilə görüşüb və onun psixoloji durumu ciddi narahatlıq doğurur: “Uzun müddət qanunsuz şəkildə dörd divar arasında saxlanıldıqdan sonra azadlığa çıxmaq ümidi qalmayıb. İki gün karserdə soyuq və natəmiz şəraitdə saxlanılıb, kamerası dağıdılıb. Qolundakı izlər hələ də sağalmayıb”.

Məlumata görə, bundan əvvəl – dekabrın 1-də Nurlan Libre Səbail Rayon Məhkəməsində dustaqlar saxlanılan kamerada Penitensiar Xidmətin “konvoy” alayının əməkdaşları tərəfindən zorakılığa məruz qalıb. O, tibbi ləvazimatların olmamasına etiraz etdikdən sonra “Fələstin halqası” adlandırılan işgəncə metodu ilə təxminən bir saat stola bağlı vəziyyətdə saxlanıldığı iddia olunur.

Nurlan Qəhrəmanlı 2025-ci il fevralın 21-də “Meydan TV” ilə əlaqəli cinayət işi üzrə həbs olunub. Ona qarşı Cinayət Məcəlləsinin 206.3.2-ci maddəsi (qaçaqmalçılıq, əvvəlcədən əlbir olan bir qrup şəxs tərəfindən törədildikdə) ilə ittiham irəli sürülüb. Məhkəmənin qərarı ilə barəsində həbs qətimkan tədbiri seçilib, sonradan həbs müddəti uzadılıb.