Prezident İlham Əliyev Əziz Əliyev adına Azərbaycan Dövlət Həkimləri Təkmilləşdirmə İnstitutunun 90 illik yubileyinə həsr olunmuş beynəlxalq elmi-praktiki konqresin iştirakçılarına müraciət edib.

Müraciətdə qeyd olunur ki, konqres dünyanın tanınmış tibb qurumlarını təmsil edən alim və mütəxəssislərin iştirakı ilə tibb elminin və səhiyyənin müxtəlif sahələrinə dair fikir mübadiləsi aparmaq üçün mühüm platformadır. Prezident vurğulayıb ki, beynəlxalq təcrübədən faydalanmaq və aktual məsələlərin həlli üçün birgə səylər səmərəli olacaqdır.

İlham Əliyev bildirib ki, ölkədə səhiyyə sistemi yeni inkişaf mərhələsinə qədəm qoyub, tibb ocaqları müasir standartlara uyğun yenidən qurulur, araşdırmalar isə son tibbi texnologiyalar əsasında aparılır. İnstitut isə həkimlərin təkmilləşdirilməsi və ixtisaslarının artırılması sahəsində mühüm rol oynayır və beynəlxalq əlaqələrini genişləndirir.

Prezident konqresin İnstitutun 90 illik yubileyinə həsr olunmasının rəmzi əhəmiyyətini vurğulayıb və tədbirin azərbaycanlı mütəxəssislərin xarici həmkarları ilə əməkdaşlığını gücləndirəcəyinə, tibbi yardımın keyfiyyətinin artırılmasına və tibb elminin inkişafına töhfə verəcəyinə əmin olduğunu bildirib.