ABŞ prezidenti Donald Tramp İranın ali rəhbəri Ayətullah Əli Xameneinin ünvanına səsləndirdiyi ittihamlara cavab verib. Tramp bildirib ki, Xameneinin açıqlamaları belə bir nəticə doğurur: İranda yeni liderlik axtarmağın vaxtı çatıb.

Tramp bu barədə Politico nəşrinə açıqlamasında danışıb. ABŞ prezidenti İran rəhbərliyini ölkədə genişmiqyaslı zorakılığa yol verməkdə günahlandırıb.

“Bir ölkənin lideri kimi onun günahı ölkənin demək olar ki, tamamilə məhv edilməsi və əvvəllər görünməmiş səviyyədə zorakılığın tətbiqidir,” – deyə Tramp vurğulayıb.

ABŞ prezidenti əlavə edib ki, ölkənin fəaliyyətini davam etdirməsi üçün rəhbərlik əsas vəzifəsini düzgün yerinə yetirməlidir:

“Ölkənin fəaliyyətini davam etdirmək üçün — bu funksiya çox aşağı səviyyədə olsa belə — rəhbərlik, mənim ABŞ-da etdiyim kimi, ölkəni düzgün idarə etməyə və nəzarəti saxlamaq üçün minlərlə insanı öldürməməyə diqqət yetirməlidir”.

Trampın açıqlamaları ABŞ–İran münasibətlərində gərginliyin davam etdiyi bir dövrdə səsləndirilib.