Azərbaycan Prezidenti İlham Əliyev dekabrın 6-da Birləşmiş Ərəb Əmirliklərinin bir sıra nüfuzlu şirkətlərinin yüksək vəzifəli şəxslərini – “2PointZero” şirkətinin sədri Şeyx Zayed bin Hamdan bin Zayed Əl Nəhyani, “International Holding Company”nin baş icraçı və idarəedici direktoru Seyid Basar Şuebini, həmçinin “International Resources Holding”in baş icraçı direktoru Əli Alraşdini qəbul edib.

Görüşdə Şeyx Zayed bin Hamdan bin Zayed Əl Nəhyani BƏƏ Prezidenti Şeyx Məhəmməd bin Zayed Al Nəhyanın salamlarını dövlət başçısına çatdırıb. O, BƏƏ Prezidenti tərəfindən Azərbaycanla bütün istiqamətlər üzrə əməkdaşlığın daha da genişləndirilməsi barədə xüsusi tapşırıq verildiyini qeyd edib. Şeyx Zayed Azərbaycan-BƏƏ münasibətlərinin uzunmüddətli və uğurlu tərəfdaşlıq əsasında inkişaf etdiyini vurğulayıb.

Prezident İlham Əliyev salamlar üçün təşəkkür edib və öz salamlarının da BƏƏ Prezidentinə çatdırılmasını xahiş edib. O, sentyabr ayında Şeyx Məhəmməd bin Zayed Al Nəhyanın Qarabağa səfərini və iki ölkə liderləri arasında həm Bakıda, həm də Əmirliklərdə keçirilmiş görüşləri məmnunluqla xatırladığını bildirib.

Dövlət başçısı Azərbaycan-BƏƏ münasibətlərinin artıq strateji tərəfdaşlıq səviyyəsinə yüksəldiyini qeyd edib, siyasi əlaqələrin yüksək səviyyədə olduğunu və müxtəlif sahələrdə əməkdaşlığın daha da genişləndiyini vurğulayıb. Prezident bərpaolunan enerji sahəsində BƏƏ-nin Azərbaycanın əsas strateji tərəfdaşlarından biri olduğunu diqqətə çatdırıb və bu istiqamətdə imzalanmış sənədlərin böyük əməkdaşlıq potensialı yaratdığını bildirib.

Görüşdə həmçinin enerji infrastrukturu, bərpaolunan enerji, mədən sənayesi, informasiya texnologiyaları, investisiyalar, neft-qaz sektoru və digər sahələrdə ikitərəfli əməkdaşlığın inkişaf perspektivləri müzakirə edilib.

Söhbət zamanı iki ölkə arasında siyasi və iqtisadi sahələrdə qarşılıqlı dəstəyin əhəmiyyəti də qeyd olunub.