Tənzilə xanım Rüstəmxanlı 2005-ci ildə 22 saylı Nəsimi seçki dairəsindən namizədliyini irəli sürmüşdü. (Mən isə 23 saylı Nəsimi-Səbail seçki dairəsindən namizəd idim - R.B) 22 saylı dairədən isə 2000-ci ildə müxalifəti saxta parlamentə sürükləyən, bu günə qədər dəyişilməz statusu olan Asim Mollazadə idi. Hakimiyyət Sabir Rüstəmxanlıya və Tənzilə Rüstəmxanlıya bildirdi ki, ailədən bir nəfər. Ya Sabir ya da Tənzilə xanım. Bu şərt qarşılığında Tənzilə xanım namizədliyini geri götürdü.

20 il sonra təklif qüvvəyə minir. Artıq Sabir erası bitdi, Tənzilə xanım erası başlayır. Bu cür insanlar hakimiyyət şəbəkəsinin əbədi və ayrılmaz üzvləridir. Digər 124 dairədə də eyni və yaxud buna bənzər vəziyyətdir. Hələ Neftçala dairəsi şükürlüdür ki, orada mübarizə ortada və hər kəsin diqqətini çəkir. Digərlərində isə saman altından su yeridilir və buna isə ortada yeyib, qıraqda gəzən müxalifət qarışmır ki, hakimiyyət növbəti dəfə öz parlamentini sakitcə, "dərə xəlvət, tülkü bəy" siyasəti ilə seçsin.

Ola bilər ki, Neftçala dairəsi ləğv edilsin və bununla da Rüstəmxanlı deputatlığına son qoyulsun. Amma ikiüzlülük siyasəti bu xalqın ümidini qırır, bu da hakimiyyətə hava və su kimi lazımdır.