Bir qrup Amerika konqresmeni bu həftə Azərbaycana qarşı sanksiyalar haqqında qanun layihəsi təqdim etməyi planlaşdırır.

Bu barədə Turan İnformasiya Agentliyinin Vaşinqtondakı müxbiri Alex Raufoğluna Konqresdəki mənbələrdən məlumat verilib.

Qanun layihəsinə görə “Azərbaycanda qanunun aliliyinin və insan hüquqlarının pozulmasında fəal rol oynayan” 40-dan çox Azərbaycan məmuruna qarşı sanksiyalar nəzərdə tutulur.

Onların arasında DTX, DİN, Baş Prokurorluq, Bakı Ağır Cinayətlər Məhkəməsi, Penitensiar Xidmət, Dövlət Sərhəd Xidməti, Prezident Administrasiyası və Müdafiə Nazirliyinin rəhbərliklərində olan rəsmilər var.

Alex Raufoğlu X sosial şəbəkəsindəki paylaşımında həmin məmurların siyahısını paylaşıb.

Onların arasında:

DTX rəisi Əli Nağıyev
Prezident Administrasiyasının rəhbəri Samir Nuriyev
Quru Qoşunlarının komandanı Hikmət Mirzəyev
Prezident Administrasiyasının şöbə müdiri Fuad Ələsgərov
Bakı Ağır Cinayətlər Məhkəməsinin hakimləri və digər rəsmilər var
İndi nə olacaq: Qanun layihəsində ABŞ qanunvericiliyi, o cümlədən Qlobal Maqnitski Qanunu çərçivəsində Bayden Administrasiyasına 180 gün ərzində qeyd edilən şəxslərə qarşı sanksiyalar haqqında qərar qəbul etmək çağırışı yer alacaq.

Qanun layihəsində baş nə var: Layihədə həmçinin erməni əsirlərin hüquqlarının pozulması barədə bəndlər də var. “Bu, Azərbaycan hökumətinin insan hüquqlarına sadiqliyi və ədalətli və möhkəm sülh haqqında danışıqlar aparmaq qabiliyyətini ciddi sual altına qoyur” – sənəddə deyilir.