Lənkəran rayonu Sütəmurdov kənd R.Dadaşov adına tam orta məktəbinin direktoru Kamran Əliyev tərəfindən Təhsildə İnkişaf və İnnovasiyalar üzrə VII qrant müsabiqəsi çərçivəsində (fərdi müəllim kimi) icra edilən “Mənim Yaşıl Dünyam” şagirdlərin ekoloji maarifləndirilməsi layihəsi yekunlaşmışdır.
Məqsədi məktəb şagirdləri üçün təbiət və onunla bağlı məsələlərə yönəldilmiş nəzəri-praktik kompleks fəaliyyətlər həyata keçirmək yoluyla onlarda təbiətə qarşı məhəbbət hissini artırmaq və onları bu istiqamətdə zəruri bilik və bacarıqlarla təchiz etməklə ətraf mühitə qarşı məsuliyyətli vətəndaş kimi tərbiyə olunmasına və yetişməsinə şərait yaratmaq olan layihə çərçivəsində ilkin mərhələdə Lənkəran rayonu Sütəmurdov məktəb şagirdlərinə (5-9 sinif) bitkilərin əkilməsi, yetişdirilməsi və onlara nəzarətin əsas aspektlərinə diqqət yetirərək sinifdə təqdimatlar və ekspertlərin apardığı müzakirələr vasitəsilə ətraf mühitin mühafizəsinin vacibliyi haqqında əsaslı şəkildə nəzəri-praktiki məlumat verilmişdir. Eyni zamanda şagirdləri praktiki fəaliyyətlərə cəlb etməklə onlar yeni əldə etmiş olduqları bilik və bacarıqları evdə bitkilərin əkilməsi fəaliyyətinə yönəltməklə onlara praktik təcrübə toplamaq imkanı verilmişdir.

Sonuncu mərhələdə evdə nümunə kimi bitkilərin yetişdirilməsi və onlara qulluq edilməsi üçün toxum və əkin materialları verilmişdir. Bu praktiki təcrübə şagirdlərə əldə etdikləri yeni bilikləri praktiki olaraq tətbiq etməyə imkan vermişdir. Proses zamanı onlar həmçinin bitkilərinə qulluq, o cümlədən suvarma, bitki artımının müşahidəsi və s. mövzularla bağlı yazılı və şifahi təlimat almışlar. Layihədə iştirak edəcək olan hər şagirdə evdə qabda 3-4 və daha çox sayda bitki əkilməsi və bitkinin yetişməsi zamanı bütün prosesləri müşahidə edərək qeydə alması tapşırığı verilmişdir. Şagirdlər bitki yetişdikcə və böyüdükcə fotoşəkillər çəkmiş və müşahidələrindən qeydlər aparmışlar. Bu materiallardan istifadə edərək, şagirdlər bitki yetişdirmə prosesi zamanı öyrəndiklərini və müşahidələrini nümayiş etdirən təqdimat hazırlamışlar. Şagirdlər eləcə də təqdimatlara digər mənbələrdən əldə etmiş olduqları maraqlı faktları və fotoşəkilləri də əlavə etmişlər. Bitki yetişdirilməsi bitdikdən sonra 1 gün təşkil ediləcək təqdimat görüşündə şagirdlər hazırladıqları təqdimatları sinif yoldaşlarına və müəllimlərinə təqdim etmişlər.

Nəticədə "Mənim Yaşıl Dünyam" layihəsinin proqram fəaliyyətləri şagirdlər üçün hərtərəfli və cəlbedici öyrənmə təcrübəsini təmin etmişdir. Şagirdlər bitkilərin ekosistemdəki rolunu və onlara qulluğun vacibliyini öyrənmiş, praktiki vərdişlərə yiyələnmişlər.

Məktəb miqyasında keçirilən tədbir şagirdlərin öz öyrəndiklərini və təcrübələrini daha geniş məktəb ictimaiyyəti ilə bölüşməsi, həmyaşıdları, müəllimlər və dəvət olunmuş qonaqlar arasında ekoloji maarifləndirmə və idarəçilik mədəniyyətini təbliğ etmək üçün mühüm addım olmuşdur.

Lənkəran-Astara Regional Təhsil İdarəsinin Lənkəran rayonu Sütəmurdov kənd R.Dadaşov adına tam orta məktəbinin müəllimi Kamran Əliyev