USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Həbsdə olan jurnalist Natiq Cavadlı ifadə verməkdən imtina edib
Jurnalist ona qarşı irəli sürülən qaçaqmalçılıq ittihamlarını əsassız sayır
Həbsdə olan Meydan TV-nin jurnalisti Natiq Cavadlının həbsindən sonra onunla bağlı istintaq hərəkətləri aparılmayıb.
Bu barədə fevralın 4-də 1 saylı Bakı İstintaq Təcridxanasında onunla görüşən vəkili Zibeydə Sadıqova məlumat verib.
Vəkilin sözlərinə görə, jurnalist istintaq materiallarını imzalamaqdan imtina edir. Çünki junalist həbs olunduğu ilk gündən ona qarşı irəli sürülən qaçaqmalçılıq ittihamlarını əsassız sayaraq ifadə verməkdən imtina edib.
Zibeydə Sadıqova qeyd edib ki, Natiq Cavadlı ruh yüksəkliyini saxlayır və ona dəstək olanların hamısına öz salamlarını çatdırır.
Meydan TV-nin 6 əməkdaşı – Aynur Elgünəş, Aysel Umudova, Aytac Əhmədova (Tapdıq), Xəyalə Ağayeva, Ramin Cəbrayılzadə (Deko) və Natiq Cavadlı, həmçinin Bakı Jurnalistika Məktəbinin direktor müavini Ülvi Tahirov dekabrın 6-da saxlanılıb.
Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
Bu maddə ilə onların hər birinin barəsində istintaq dövrü üçün 4 aylıq həbs qətimkan tədbiri seçilib.
Saxlanılan jurnalistlərin evində axtarış aparılıb, telefonları, kompüterləri və digər şəxsi əşyaları götürülüb.
Həbs olunan jurnalistlər özlərini təqsirli bilmir.
Meydan TV əməkdaşlarının tənqidçi fəaliyyətlərinə görə cəzalandırıldıqlarını bəyan edib.
Fevralın 5-də “Meydan TV işi” ilə bağlı daha bir jurnalist Şəmşad Ağayev (Ağa) həbs edilib.
Son 1 il 2 ay ərzində Azərbaycanda 30-a yaxın jurnalist və bloger həbs olunub.
Onların arasında “AbzasMedia”, “Toplum TV”, “Kanal 13” və digər media orqanlarının əməkdaşları var.
