"Arqument.az" saytının rəhbəri Şəmşad Ağa saxlanılıb.

Jurnalist qaçaqmalçılıqda ittiham olunur. Onun "Meydan TV işi" üzrə saxlanıldığı bildirilir.

Fevralın 4-dən 5-nə keçən gecə arqument.az saytının baş redaktoru, jurnalist Şəmşad Ağayev (Ağa) saxlanılıb.

Qardaşı Şahid Ağayevin bildirdiyinə görə, gecə saat 2 radələrində müstəntiq və 7-8 maskalı polis əməkdaşı onun Bakı şəhərində yaşadığı evdə axtarış aparılıb:

“Polislər evimizə girdilər, hər yeri axtardılar. Şəmşadın köhnə telefonunu, mənim telefonumu, yaddaş kartlarını, bir neçə köhnə diski, komputeri, modemi, Şəmşada aid olan jurnalist vəsiqələrini götürdülər. Daha sonra protokol tərtib etdilər. Şəmşad yalnız dedi ki, onu tutublar” – qardaşı belə deyib.

Vəkil Şəhla Hümbətova bildirib ki, Şəmşad Ağa “Meydan TV işi” üzrə Cinayət Məcəlləsinin 206.3.2-ci (qaçaqmalçılıq — qabaqcadan əlbir olan bir qrup şəxs tərəfindən törədildikdə) maddəsi ilə şübhəli şəxs qismində saxlanılıb.

Onun saxlanması ilə bağlı rəsmi qurumlar hələlik açıqlama verməyiblər.

Ötən il iyulun 5-də jurnalist Şəmşad Ağa Bakı Şəhər Baş Polis İdarəsində “Toplum TV işi” üzrə şahid qismində dindirilib. İstintaq orqanı şifahi şəkildə onun ölkədən çıxışına qadağa qoyulduğunu bildirib.

2024-cü il dekabrın 6-da Meydan TV-nin əməkdaşları Ramin Deko (Cəbrayılzadə), Aynur Qənbərova (Elgünəş), Aysel Umudova, Aytac Əhmədova (Tapdıq), Xəyalə Ağayeva, Natiq Cavadlı saxlanılıblar. Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Bu maddə ilə onların barəsində istintaq dövrü üçün 4 aylıq həbs qətimkan tədbiri seçilib.

Meydan TV əməkdaşları ilə yanaşı, eyni gündə vətəndaş cəmiyyətinin üzvü Ülvi Tahirov da saxlanılıb. Eyni ittihamla onun da barəsində 4 aylıq həbs qətimkan tədbiri seçilib. Ülvi Tahirovun Meydan TV-yə aidiyyəti yoxdur.

Məlumatı DİN mətbuat xidmətinin əməkdaşı polis leytenantı Elbrus İbrahimov təsdiqləyib.