İyunun 1-də Bakının mərkəzində, “28 May” metrostansiyası yaxınlığında gənc Elgün İbrahimovun müəmmalı ölümü ilə bağlı keçirilən etiraz aksiyası zamanı 50-dən çox şəxsin saxlandığı bildirilir. Bu barədə sosial şəbəkələrdə yayılan məlumatlarda və fəal Gülnara Mehdiyevanın paylaşımında qeyd olunur.

Mehdiyeva “Facebook”da yazdığına görə, aksiya başlamazdan əvvəl polis metrostansiya ətrafında toplaşan şəxsləri səbəb göstərmədən saxlayıb. Saxlanılanların mobil telefonları müsadirə olunub, şəxsi yazışmaları yoxlanılıb, barmaq izləri götürülüb. O iddia edir ki, bəzi şəxslər sonradan sərbəst buraxılsa da, onların mobil telefonları hələ qaytarılmayıb.

Aksiya ilə bağlı rəsmi qurumlardan hələ heç bir açıqlama verilməyib. Saxlanılanların sayı və kimlikləri də dəqiq bilinmir.

Etiraz aksiyası 18 yaşlı məktəbli Elgün İbrahimovun vəfatı ilə bağlı təşkil olunub. O, mayın 12-də Gəncədə istifadə olunmayan yataqxananın həyətində çoxsaylı xəsarətlərlə tapılmış, ertəsi gün xəstəxanada ölmüşdü. Rəsmi istintaq onun hündürlükdən yıxılaraq öldüyünü açıqlasa da, ailəsi və bir çox sosial media istifadəçiləri Elgünün döyülərək öldürüldüyünə inanır. Sosial şəbəkələrdə yayılan videolardan birində təcili yardım əməkdaşının “bunu möhkəm döyüblər” dediyi eşidilir.

Etiraz zamanı aksiyaçılar Elgünün fotosunu əks etdirən plakatları küçələrə yapışdırıb, “Susma, susduqca sıra sənə də gələcək” yazılı vərəqlər paylayıblar. Aksiyanın Uşaqların Beynəlxalq Müdafiəsi Günündə keçirilməsi, həm Elgün İbrahimovun ölümü, həm də son illərdə uşaqlara qarşı zorakılıq və erkən nikah hallarına diqqət çəkmək məqsədi daşıyıb.

Hazırda saxlanılan şəxslərin taleyi, hüquqlarının təmin olunub-olunmaması və hadisə ilə bağlı əlavə istintaq tədbirləri ilə bağlı ictimaiyyətə açıq məlumat verilməyib.