30 may 2025 – Baş Prokurorluq, Daxili İşlər Nazirliyi və Dövlət Təhlükəsizliyi Xidməti mayın 13-də Gəncə şəhərində xəstəxanada vəfat edən 18 yaşlı Elgün İbrahimovun ölümü ilə bağlı birgə bəyanat yayıblar. Bəyanatda bildirilir ki, aparılan istintaq nəticəsində İbrahimovun hündürlükdən yıxılaraq aldığı çoxsaylı xəsarətlərdən həyatını itirdiyi müəyyən olunub.

Qurumların açıqlamasına görə, istintaq çərçivəsində mərhumun intihar etməsi, ehtiyatsızlıqdan yıxılması və ya kənar şəxslər tərəfindən ona xəsarət yetirilməsi ehtimalları araşdırılıb. Mövcud sübutlar – şahid ifadələri, hadisə yerinə və müşahidə kameralarına baxış, meyitin tibbi ekspertizası, telefon məlumatları və digər ekspertiza rəyləri – nəticəsində Elgün İbrahimovun hər hansı zorakılığa məruz qalmadığı qənaətinə gəlinib.

Bəyanatda qeyd olunur ki, Elgün İbrahimov mayın 12-də axşam saatlarında dostları ilə restoranda yemək yeyib, onlardan ayrıldıqdan sonra marketdən iki qutu siqaret alaraq Gəncə Texnologiya Universitetinin yataqxanasının 5-ci mərtəbəsində yerləşən eyvana çıxıb. Orada bir neçə siqaret çəkdikdən sonra eyvandan aşağı – torpaqla örtülmüş sərt səthə yıxılıb. Saat 22:52-də ərazidəki gözətçi onu yaralı vəziyyətdə aşkarlayıb və təcili tibbi yardım çağırılıb. İbrahimov xəstəxanaya çatdırılsa da, mayın 13-də aldığı xəsarətlər nəticəsində vəfat edib.

Lakin mərhumun ailəsi onun döyülərək öldürüldüyünü iddia edir. Hadisədən sonra sosial şəbəkələrdə yayılan bir videoda təcili tibbi yardım əməkdaşının “bunu möhkəm döyüblər” dediyi də eşidilir. Bu cür paylaşımlar cəmiyyətdə müxtəlif suallar yaradıb.

Hüquq-mühafizə orqanları mediadan, sosial şəbəkə istifadəçilərindən və ictimai fəallardan məsələ ilə bağlı həssas yanaşmalarını, istintaqın gedişinə mane ola biləcək və cəmiyyətdə çaşqınlıq yarada biləcək informasiyaların yayılmamasını xahiş ediblər.

Hazırda cinayət işi üzrə istintaq davam edir.