“Sərhədsiz Reportyorlar” (RSF) təşkilatı Milli Məclisin iyulun 14-də “Media haqqında” Qanuna etdiyi son dəyişikliklərlə bağlı bəyanat yayıb. Təşkilat bildirib ki, qəbul edilən yeniliklər Azərbaycanda müstəqil medianın fəaliyyətini daha da çətinləşdirir və faktiki olaraq onu qeyri-mümkün edir.

Bəyanatda qeyd olunur ki, yeni qanun dəyişiklikləri media sektoruna əlavə məhdudiyyətlər gətirir. Xüsusilə, Azərbaycanda fəaliyyət göstərmək istəyən xarici media qurumları bundan sonra dövlət qeydiyyatına alındıqdan sonra 7 iş günü ərzində Media Reyestrində qeydiyyatdan keçməlidirlər. Bu tələbi yerinə yetirməyənlərin fəaliyyəti dayandırılacaq, saytlarına giriş məhdudlaşdırılacaq.

Təşkilat yeni tələblər arasında bəzi “absurd” şərtlərin də yer aldığını vurğulayıb. Məsələn, xəbər agentliklərinin fəaliyyət göstərə bilməsi üçün ən azı 20 media qurumunun onların xəbər lentinə abunə olması və agentliyin 5 xarici ölkədə akkreditə olunmuş jurnalisti olması tələb olunur. RSF bildirib ki, Azərbaycanda hazırda bu şərtləri ödəyə biləcək müstəqil agentliklər və abunə ola biləcək azad media qurumları demək olar ki, qalmayıb.

Bəyanatda həmçinin Azərbaycanda hazırda 29 jurnalistin həbsdə olduğu xatırladılıb və onların azadlığa buraxılması tələb olunub. Təşkilat qeyd edib ki, bu jurnalistlər hökumətin medianı susdurmaq siyasətinin qurbanlarıdır.

RSF Azərbaycanın yeni media qanununu repressiv adlandıraraq onun ləğv edilməsini və hökumətin ifadə azadlığına hörmətlə yanaşmasını tələb edib.

Qeyd edək ki, “Media haqqında” Qanun 2022-ci ilin fevralında qüvvəyə minib və bu müddət ərzində dəfələrlə dəyişdirilib. Hazırda bu qanunun Konstitusiyaya və Avropa İnsan Hüquqları Konvensiyasına zidd olduğunu əsas gətirən yerli media qurumları Konstitusiya Məhkəməsinə müraciət ediblər. Avropa Şurası Nazirlər Komitəsi də 2023-cü ilin sonunda Azərbaycan hakimiyyətini bu qanunu Avropa standartlarına uyğunlaşdırmağa çağıran qətnamə qəbul etmişdi.