Münhen Məhkəməsi Eduard Lintneri təqsirli bildi – 9 ay şərti həbs cəzası

Almaniyanın Münhen şəhərində keçirilən məhkəmə prosesində keçmiş Bundestaq üzvü Eduard Lintner Azərbaycan hakimiyyəti adından rüşvət verməkdə təqsirli bilinərək doqquz ay şərti həbs cəzasına məhkum edilib. Bu barədə Mütəşəkkil Cinayətkarlıq və Korrupsiyaya Qarşı Mübarizə Layihəsi (OCCRP) məlumat yayıb.

80 yaşlı Lintner bu ittihamla cəzalandırılan ilk alman qanunvericisi kimi tarixə düşüb. Altı ay davam edən məhkəmə prosesində o, özünü təqsirli saymayaraq, Azərbaycanı dəstəkləməsini “şərəfli motivlərlə həyata keçirilmiş qanuni lobbiçilik fəaliyyəti” kimi təqdim edib. Lakin Münhen Ali Regional Məhkəməsi iyulun 30-da Lintnerin digər siyasətçilərə etdiyi ödənişlərin rüşvət olduğunu müəyyən edib.

Eduard Lintner 33 il boyunca Bundestaqda deputat olub və 2017-ci ildə “OCCRP” və tərəfdaş medianın araşdırmaları zamanı ifşa edilən “Azərbaycanın pulyuyan maşını” sxemində adı hallanan əsas fiqurlardan biri olub. Həmin araşdırmaya görə, Azərbaycanın hakim dairələri 2,9 milyard dollarlıq gizli fond vasitəsilə Avropada siyasi təsir imkanlarını artırmaq üçün rüşvətlər veriblər.

Məhkəmənin qərarında həmçinin, 2021-ci ildə vəfat etmiş keçmiş deputat Karin Strenzin həyat yoldaşından 111,330 avronun geri alınması da yer alıb. İstintaq müəyyən edib ki, Strenz həm Lintnerdən, həm də Azərbaycan rəsmilərindən Avropa Şurası Parlament Assambleyasında Bakının maraqlarını müdafiə etmək məqsədilə rüşvət alıb.

“Transparency International” təşkilatının baş direktoru Maíra Martini məhkəmə qərarını alqışlayaraq bildirib:

“‘Azərbaycan pulyuyan maşını’ sxemi ilə əlaqəsi olan digər ölkələrin də Almaniyanın nümunəsini izləməsi vacibdir. Rüşvət alan və repressiyaları legitimləşdirməyə çalışan şəxslər cəzasız qalmamalıdır”.

Bu qərar Avropada Azərbaycandan qaynaqlanan korrupsiya sxemlərinə qarşı ilk hüquqi cəza tədbirlərindən biri kimi qiymətləndirilir.