USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Hesablama Palatasının auditləri milyonlarla manatlıq pozuntu aşkarlasa da, nəticələr sual doğurur
Hesablama Palatasının son audit hesabatlarında bir sıra dövlət qurumlarında ciddi maliyyə pozuntularının aşkarlandığı bildirilsə də, bu faktlarla bağlı vəzifəli şəxslərin məsuliyyətə cəlb olunması barədə məlumatların olmaması müzakirələrə səbəb olub.
Hesabatda qeyd olunur ki, Azərbaycan Avtomobil Yolları Dövlət Agentliyində 2024-cü ildə proqnozdan 176 milyon manat artıq vəsait xərclənib. Bundan başqa, Dövlət Gömrük Komitəsində yeni inzibati binanın tikintisi üzrə təxminən 18 milyon manatlıq vəsaitin maliyyə sənədlərində tam əks etdirilmədiyi göstərilib.
Əvvəlki illərdə də müxtəlif dövlət qurumlarında müqavilə məbləğlərinin şişirdilməsi, inventarizasiyanın gecikdirilməsi və məlumatların sistemlərə tam daxil edilməməsi kimi pozuntularla bağlı açıqlamalar verilib. Lakin bu faktlarla bağlı cinayət işləri və ya cəzalar barədə ictimaiyyətə açıq məlumat təqdim olunmur.
Son hesabatlardan sonra hökumətyönlü mediada Baş Prokuror yanında Korrupsiyaya Qarşı Mübarizə Baş İdarəsinin Gəncə Şəhər İcra Hakimiyyətində araşdırma apardığı bildirilib. Auditdə Gəncə İdman Sarayının tikintisi zamanı işlərin dəyərinin təxminən 11 milyon manat artırıldığı qeyd olunmuşdu.
Natiq Cəfərli sosial şəbəkə hesabında Hesablama Palatasının hesabatını “çox keyfiyyətli sənəd” adlandırsa da, aşkarlanan yeyinti faktlarına görə neçə nəfərin cəzalandırıldığını sual edib.
Siyasi şərhçi Araz Əliyev isə bildirib ki, son illərdə auditlərin əsas məqsədi korrupsiyaya qarşı sistemli mübarizə deyil, məmurlar üzərində nəzarəti gücləndirməkdir.
Onun fikrincə, hakimiyyət maliyyə pozuntularına münasibətdə seçici yanaşma nümayiş etdirir və vətəndaş cəmiyyəti ilə müqayisədə yüksək vəzifəli şəxslərə qarşı daha yumşaq davranır.
