İlham Əliyev mayın 5-də Kaja Kallasın başçılıq etdiyi nümayəndə heyətini qəbul edib.

Görüşdə tərəflər əvvəlki təmasları məmnunluqla xatırlayıb, xüsusilə Kallasın 2025-ci ildə Azərbaycana səfəri zamanı əməkdaşlığın genişləndirilməsi istiqamətində aparılan müzakirələrin əhəmiyyətini qeyd ediblər.

Kaja Kallas Antonio Costanın salamlarını dövlət başçısına çatdırıb. Prezident İlham Əliyev isə təşəkkürünü bildirərək öz salamlarını da qarşı tərəfə çatdırmağı xahiş edib.

Görüş zamanı Azərbaycan ilə Avropa İttifaqı arasında münasibətlərin strateji xarakter daşıdığı vurğulanıb. Qeyd olunub ki, Avropa İttifaqı Azərbaycanın əsas ticarət tərəfdaşlarından biridir və Azərbaycan da enerji təhlükəsizliyi sahəsində Aİ üçün etibarlı tərəfdaşdır.

Prezident İlham Əliyev bildirib ki, son dövrlərdə Azərbaycan qazının Aİ-nin daha iki üzvü – Almaniya və Avstriyaya çatdırılması əməkdaşlığın genişləndiyini göstərir.

Görüşdə həmçinin Azərbaycan-Ermənistan münasibətləri və sülh prosesi müzakirə olunub. Azərbaycanın sülh gündəliyinə sadiq olduğu, tranzit məhdudiyyətlərinin aradan qaldırıldığı və artıq iqtisadi-ticari əlaqələrin formalaşdığı diqqətə çatdırılıb.

Söhbət zamanı İrəvanda keçirilmiş Avropa Siyasi Birliyi Zirvə toplantısında Prezident İlham Əliyevin videobağlantı vasitəsilə iştirakı tarixi hadisə kimi qiymətləndirilib.