2015-ci ildə sərhədi qanunsuz keçərək Almaniyaya gedən jurnalist Şirin Abbasov (Tire) ötən gün Azərbaycana qayıdıb.

Barəsində cinayət işi başlanılaraq həbsli axtarışa verilmiş jurnalist bu gün məhkəməyə çıxarılıb.

Məlumat üçün deyək ki, Şirin Abbasov barəsində 9 il əvvəl Cinayət Məcəlləsinin 318-ci (dövlət sərhədini qanunsuz keçmə) maddəsi ilə cinayət işi başlanılıb, həbsli axtarışa verilib.
Bu səbəbdən o, ötən gün ölkəyə qayıdan kimi hava limanında saxlanılıb.

Bu gün prokurorluq Şirin Abbasov barəsindəki həbs qətimkan tədbirinin ləğv edilərək, sərbəst buraxılması ilə bağlı məhkəməyə təqdimat verib.

Binəqədi Rayon Məhkəməsi təqdimatı təmin edib.
Jurnalist məhkəmə zalından azadlığa buraxılıb. Onun barəsindəki cinayət işi isə davam edir.

Foto.info.az -ın əldə etdiyi məlumata görə o, dövlət orqanları ilə razılığa gələrək “Abzas Media” işi üzrə həbs olunan jurnalistlərin əleyhinə ifadə verilməsi uçün Azərbaycana gəlib. Bundan sonra barəsində açılmış Cinayət Məcəlləsinin 318-ci (dövlət sərhədini qanunsuz keçmə) maddəsi ilə cinayət işinə xitam veriləcəyinə dair razılıq əldə edilib.

Bu barədə Time TV paylaşım edib:

“DTX ilə razılaşıb Azərbaycana qayıdan mühacir jurnalisti Şirin Abbasov bu gün Bakı aeroportundan yoxa çıxıb. Time TV bildirir ki, bu barədə məlumat sosial şəbəkədə paylaşılıb. Bəzi mənbələr isə onun hazırda Baş Mütəşəkkil Cinayətkarlıqla Mübarizə İdarəsində olduğunu, müstəntiq Cavid Yadigarov tərəfindən dindirildiyini bildirir.

Xatırladaq ki, Şirin Tire kimi tanınan jurnalist 2016-cı ildə Meydan.tv işinə görə 30 gün həbs yatıb, sonra Almaniyaya mühacirət edib. Onun bir müddət öncə Azərbaycanın Berlindəki səfirliyinin əməkdaşları vasitəsilə ələ alındığı, Abzas Media və digər işlər üzrə şahid kimi ifadə verməsinin razılaşdırıldığı qeyd olunur. İddiaya görə, jurnalist Azərbaycan Dövlət Təhlükəsizlik Xidmətinin əməkdaşları ilə əməkdaşlıq çərçivəsində Azərbaycana qayıdıb. Onun həbsdəki jurnalistlərin əleyhinə ifadələr verəcəyi iddia edilir. Özü isə bunlara heç bir münasibət bildirməyib.

Maraqlıdır ki, bu məlumat digər media vasitələrinə də məlum olsa da, yalnız Time TV bunu yayıb. Digər müstəqil media qurumları isə hansısa səbəbdən ehtiyatlı hərəkət nümayiş etdirirlər.”

Bu gün “Abzas Media” -nın jurnalisti Elnarə qasımovanın həyat yoldaşı oğurlanıb.