UEFA Çempionlar Liqasının pley-off mərhələsində Azərbaycan çempionu “Qarabağ” Macarıstanın “Ferentsvaroş” klubunu iki oyunun nəticəsinə görə üstələyərək Liqa mərhələsinə adlayıb.

Tofiq Bəhramov adına Respublika stadionunda keçirilən cavab görüşündə “Qarabağ” 2:3 hesabı ilə məğlub olsa da, ümumi nəticədə üstünlüyünü qoruyub. Oyunda meydan sahiblərinin qollarını Leandro Andrade (25-ci dəqiqə) və Abdullah Zubir (45-ci dəqiqə) vurublar. Qonaqların heyətində isə Lenni Josef (14), Barnabas Varqa (55-ci dəqiqə, penalti) və Aleks Tot (82) fərqləniblər.

Xatırladaq ki, Budapeştdə keçirilən ilk matçda Qurban Qurbanovun komandası 3:1 hesabı ilə qələbə qazanmışdı. Beləliklə, iki oyunun nəticəsinə əsasən 5:4 ümumi hesabla “Ferentsvaroş”u mübarizədən kənarlaşdıran “Qarabağ” tarixində ikinci dəfə Çempionlar Liqasının Liqa mərhələsinə vəsiqə qazanıb.

Qurban Qurbanovun yetirmələri daha öncə 2017/2018 mövsümündə də turnirin qrup mərhələsinə yüksəlmişdi.

“Qarabağ”ın Liqa mərhələsindəki rəqibləri UEFA-nın püşkatma mərasimində müəyyənləşəcək.