Bu gün “Meydan TV işi” üzrə istintaq yekunlaşıb və təqsirləndirilən şəxslərə yeni, daha ağır ittihamlar elan olunub. Bakı Şəhər Baş Polis İdarəsində aparılan istintaqın sonunda jurnalistlərə qarşı Cinayət Məcəlləsinin səkkiz maddəsi ilə ittiham irəli sürülüb.

Yeni ittihamlar arasında qanunsuz sahibkarlıq (192.2.2; 192.2.3), cinayət yolu ilə əldə edilmiş əmlakın leqallaşdırılması (193-1.3.1; 193-1.3.2), qaçaqmalçılıq (206.4), vergidən yayınma (213.2.1), sənəd saxtalaşdırma (320.1) və saxta sənədlərdən istifadə (320.2) maddələri var.

İttiham olunan jurnalistlər ümumilikdə Cinayət Məcəlləsinin 8 maddəsi ilə məsuliyyətə cəlb olunublar. Tanışolma mərhələsindən sonra cinayət işi baxılması üçün Bakı Ağır Cinayətlər Məhkəməsinə göndəriləcək.

Jurnalistlərin mövqeyi

Meydan TV əməkdaşları həbslərinin siyasi sifariş olduğunu bildirirlər. 2025-ci il avqustun 15-də həbsxanadan yayılan bəyanatda jurnalistlər yazıblar:
“Hakimiyyət yeni saxtakarlığa hazırlaşır. İctimaiyyət üçün siyasi şou yaradan hakimiyyətə deyirik ki, gözləntiləriniz fiaskoya uğrayıbsa, bunu başqa bir saxtakarlıqla kompensasiya etməyin. Bizim əməlimizdə cinayət tərkibi yoxdur. Jurnalistika cinayət deyil!”

Kimlər həbs olunub?

“Meydan TV işi” çərçivəsində ilk həbslər 2024-cü il dekabrın 6-da həyata keçirilib. Meydan TV-nin əməkdaşları Ramin Cəbrayılzadə (Deko), Aynur Qənbərova (Elgünəş), Aytac Əhmədova (Tapdıq), Aysel Umudova, Xəyalə Ağayeva və Natiq Cavadlı saxlanılıb. Həmin vaxt onlara qarşı ilkin olaraq Cinayət Məcəlləsinin 206.3.2-ci (qaçaqmalçılıq – qrup halında törədildikdə) maddəsi ilə ittiham irəli sürülmüşdü.

Sonrakı aylarda daha bir neçə jurnalist bu iş üzrə həbs olunub:
• Bakı Jurnalistika Məktəbinin direktor müavini Ülvi Tahirov (6 dekabr 2024)
• “Arqument.az” saytının baş redaktoru, jurnalist Şəmşad Ağayev (Ağa) (5 fevral 2025)
• Jurnalist Nurlan Libre (Qəhrəmanlı) (20 fevral 2025)
• Jurnalist Fatimə Mövlamlı (28 fevral 2025)
• Jurnalist Ülviyyə Əli (Quliyeva) (7 may 2025)

Həbs olunan jurnalistlərin hamısı ittihamları rədd edir və fəaliyyətlərinə görə siyasi sifarişlə cəzalandırıldıqlarını deyirlər.