Azərbaycan Respublikasının Prezidenti İlham Əliyev avqustun 28-də Avropa İttifaqının Cənubi Qafqaz üzrə xüsusi nümayəndəsi Maqdalena Qrononu qəbul edib.

Qrono Prezidentə Avropa İttifaqının rəhbərliyinin salamlarını çatdıraraq, Vaşinqtonda Ermənistanla münasibətlərin normallaşdırılması və sülh gündəliyi ilə bağlı əldə edilmiş mühüm nəticələr münasibətilə təbrik edib. O, bu prosesin regionda davamlı sülhün təmin olunmasına böyük töhfə verdiyini vurğulayıb və Avropa İttifaqına üzv dövlətlərin də Azərbaycanla Ermənistan arasında əldə olunmuş sülhü dəstəklədiyini qeyd edib. Qonaq həmçinin iki ölkə arasında razılaşdırılmış məsələlərin, o cümlədən nəqliyyat dəhlizinin həyata keçirilməsi prosesinə Avropa İttifaqının dəstək verməyə hazır olduğunu bildirib.

Prezident İlham Əliyev salamlar və təbriklərə görə minnətdarlığını bildirib və öz növbəsində salamlarını Avropa İttifaqının rəhbərliyinə çatdırmağı xahiş edib. Dövlət başçısı Vaşinqtonda əldə olunan nəticələrin tarixi əhəmiyyət kəsb etdiyini qeyd edib, ABŞ-ın bu prosesdəki rolunu vurğulayıb. O, ABŞ vasitəçiliyi ilə imzalanmış Vaşinqton bəyannaməsi, sülh sazişinin paraflanması və Minsk qrupunun ləğv edilməsi ilə bağlı Azərbaycan və Ermənistanın birgə müraciətini sülh prosesində atılan mühüm addımlar kimi qiymətləndirib.

Görüşdə həmçinin Azərbaycan ilə Ermənistan arasında ikitərəfli etimad quruculuğu tədbirlərinə dəstək ifadə olunub. Dövlət başçısı ölkənin əsas hissəsi ilə Naxçıvan arasında maneəsiz nəqliyyat və tranzit əlaqələrinin yaradılmasının vacibliyini vurğulayıb və Naxçıvanda nəqliyyat infrastrukturunun yenilənməsi istiqamətində Avropa İttifaqı ilə əməkdaşlıq üçün geniş imkanların olduğunu bildirib.

Söhbət zamanı Azərbaycan ilə Avropa İttifaqı arasında əməkdaşlığın perspektivləri də müzakirə olunub.