Rusiyanın ATƏT-dəki nümayəndəsi Aleksandr Lukaşeviç bildirib ki, Moskva Minsk Qrupunun fəaliyyətinin dayandırılmasına qarşı çıxmayacaq.

Onun sözlərinə görə, bu ilin dekabrına qədər Minsk Qrupunun buraxılması planlaşdırılır:
“Tərəflərin bu strukturun saxlanmasının məqsədəuyğun olmadığına dair mövqeyini nəzərə alaraq, biz onların buraxılmasına maneə yaratmağa əsas görmürük”, – Lukaşeviç deyib (“RBK”).

Xatırladaq ki, avqustun 8-də Vaşinqtonda Azərbaycan və Ermənistanın xarici işlər nazirləri Minsk Qrupunun ləğvi ilə bağlı ATƏT-ə birgə müraciət imzalayıb. Azərbaycan XİN rəhbəri Ceyhun Bayramov isə sentyabrın 1-də təşkilatın iclasında bu məsələyə baxılacağını açıqlamışdı.

1992-ci ildə yaradılan Minsk Qrupuna Fransa, Rusiya və ABŞ həmsədrlik edib. Qurum 2020-ci ildəki İkinci Qarabağ müharibəsinədək Ermənistan və Azərbaycan arasında əsas danışıqlar platforması kimi fəaliyyət göstərib.

Prezident İlham Əliyev dəfələrlə Minsk Qrupunu fəaliyyətsizlikdə ittiham edərək onun ləğvini sülh müqaviləsinin imzalanması üçün əsas şərtlərdən biri kimi göstərib.