USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Sərhədsiz Reportyorlar” həbsdə olan jurnalistlər üçün “sərinkeş kampaniyası”na başlayıb
Beynəlxalq mətbuat azadlığı təşkilatı “Sərhədsiz Reportyorlar” (RSF) Azərbaycanda həbsdə olan jurnalistlərə dəstək üçün yeni kampaniya elan edib. Aksiyaya mühacirətdə fəaliyyət göstərən Toplum TV, Azad Səslər Kollektivi, Meydan TV və Qəzetçi də qoşulub.
“Onları sərinkeş atəşinə tutun” adlı kampaniya çərçivəsində ictimaiyyətə həbsdə olan jurnalistlərə həmrəylik məktubları yazmaq təklif olunur. Məktublar daha sonra üzərində simvolik sərinkeş təsviri olan açıqçalara çap edilərək birbaşa Bakı İstintaq Təcridxanasına göndəriləcək.
Kampaniyanın adı “Abzas Media”nın həbsdə olan jurnalisti Sevinc Vaqifqızı ilə bağlı baş verən hadisədən qaynaqlanır. Onun ailəsinin yay istisində gətirdiyi sərinkeş təcridxana rəhbərliyi tərəfindən qəbul edilməyib. RSF-in açıqlamasına görə, müəssisənin rəisi Elnur İsmayılov jurnalistə qarşı şərt qoyub: “yazmaqdan əl çəksin”. Lakin Vaqifqızı həbsxanadan insan hüquqları pozuntuları və şəraitlə bağlı yazmağa davam edib.
“Əksər məhbuslar yayda sərinkeş əldə edə bildiyi halda, Sevincə bunun qadağan olunması açıq senzura və repressiya aktıdır”, – RSF bəyan edib.
Təşkilatın Almaniya üzrə icraçı direktoru Anca Osterhaus deyib:
“Biz göstərmək istəyirik ki, onların səsini həbs divarları da boğa bilməz. Azərbaycan hakimiyyəti jurnalistləri peşələrinə görə cəzalandırmağı dayandırmalı və onlara əsas ehtiyaclara çıxış imkanı verməlidir.”
RSF-in Şərqi Avropa və Mərkəzi Asiya üzrə rəhbəri Cin Kavelyer isə bildirib ki, Sevinc Vaqifqızının sadə bir sərinkeşdən məhrum edilməsi hakimiyyətin mətbuat azadlığını boğmaq üçün qəddarlığa əl atdığının bariz nümunəsidir.
Bəyanatda həmçinin vurğulanır ki, 2023-cü ilin noyabrından bəri Azərbaycanda ən azı 25 jurnalist həbs edilib – onların çoxu Toplum TV, Meydan TV və “Abzas Media” ilə bağlıdır.
Kampaniya təşkilatçıları hesab edirlər ki, hökumətin həbsxanalarda artan təzyiqləri ölkədə fərqli fikirləri susdurmaq və müstəqil medianı tamamilə sıradan çıxarmaq siyasətinin tərkib hissəsidir.
