Almaniyada işsizlərin sayı 2015-ci ildən bəri ilk dəfə üç milyonu ötüb. Federal Məşğulluq Agentliyinin açıqlamasına görə, avqust ayında işsizlərin sayı əvvəlki ayla müqayisədə 46 min nəfər artaraq 3 milyon 250 min nəfərə çatıb. Bu göstərici ötən ilin eyni dövrü ilə müqayisədə 153 min nəfər çoxdur.

Rəsmi statistikaya əsasən, işsizlik səviyyəsi iyul ayına nisbətən 0,1 faiz bəndi artaraq 6,4 faiz təşkil edib. Agentliyin rəhbəri Andrea Nahles bildirib ki, əmək bazarı hələ də son illərin iqtisadi tənəzzülündən təsirlənir:
“Əmək bazarı son illərin iqtisadi geriləməsinin təsirini yaşayır. Bununla belə, stabilləşmənin ilkin əlamətləri də görünməkdədir.”

Mütəxəssislərin fikrincə, yay tətili dövründə şirkətlərin işə qəbul prosesini məhdudlaşdırması da işsizliyin artmasına təsir göstərib.

Ən yüksək işsizlik Bremen (11,8 faiz) və Berlində (10,5 faiz) qeydə alınıb. Ən aşağı göstəricilər isə Bavariya (4,2 faiz) və Baden-Vürtemberqdə (4,7 faiz) müşahidə olunub.

Qeyd edək ki, Almaniyada işsizlərin sayı sonuncu dəfə 2015-ci ilin fevralında üç milyonu keçmişdi. Bu baxımdan avqust ayı son 15 ilin ən yüksək rəqəmlərindən biri kimi tarixə düşüb.