USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azərbaycanın Moskvadakı konsulluğu qarşısında etiraz aksiyası keçirilib, iştirakçılar saxlanılıb
Moskvada “Başqa Rusiya” Milli-Bolşevik Partiyasının fəalları Azərbaycanın konsulluğu qarşısında etiraz aksiyası keçiriblər. Onlar Azərbaycan Prezidenti İlham Əliyevin fotosu olan plakat qaldıraraq müxtəlif şüarlar səsləndiriblər.
Aksiya Rusiya–Azərbaycan münasibətlərində son vaxtlar müşahidə olunan gərginlik fonunda baş tutub. Etirazçılar Bakıda saxlanılan rusiyalı jurnalistlərin azad edilməsini, fəaliyyəti dayandırılan Rus Evinin yenidən açılmasını tələb ediblər. Həmçinin Azərbaycanın Ukraynaya göstərdiyi yardıma qarşı çıxıblar.
Etirazçılar bəyan ediblər ki, “Azərbaycan rəhbərliyi Kiyevlə əməkdaşlıq edir, Rusiya ilə dostluq münasibətlərini pozur, Bakıda Rus Evi bağlanıb və rusiyalı jurnalistlər həbs olunub”.
Aksiya zamanı polis üç nəfəri – Qleb Yejovu, Daniil Şmalkonu və İvan Qubini – saxlayıb.
Xatırladaq ki, iyunun 30-da Bakıda “Sputnik Azərbaycan”ın ofisində keçirilən əməliyyat zamanı jurnalistlər İqor Kartavıx və Yevgeni Belousov saxlanılmışdı. Onlar dələduzluq və qanunsuz sahibkarlıqda ittiham olunaraq 4 aylıq həbs edilmişdilər.
Azərbaycan–Rusiya münasibətlərində gərginlik 2024-cü ilin dekabrında baş verən AZAL təyyarə qəzasından sonra daha da artıb. Azərbaycan Prezidenti İlham Əliyev təyyarənin Rusiya ordusu tərəfindən vurulduğunu bildirmişdi. Bu ilin iyununda isə Yekaterinburqda azərbaycanlılarla bağlı insident iki ölkə arasında qarşılıqlı ittihamların güclənməsinə səbəb olub.
Avqustun 26-da Prezident İlham Əliyev “Əl-Ərəbiyyə” telekanalına müsahibəsində Bakı ilə Moskva arasındakı gərginliyə görə Azərbaycanın məsuliyyət daşımadığını bəyan edib.
