Ermənistanın “Hraparak” qəzeti yazır ki, Avstriyada fəaliyyət göstərən Ermənistan konsulluğunun əməkdaşı Aşxen Aleksanyan Azərbaycana işləməkdə ittiham olunaraq həbs edilib. Məlumata görə, hadisə təxminən iki ay əvvəl baş versə də, ictimaiyyətdən gizli saxlanılıb.

Qəzetin iddiasına görə, gənc diplomat Ermənistana qayıdarkən hava limanında saxlanılıb. Onun üzərindən Azərbaycanın xeyrinə casusluq etdiyini sübut edən sənədlər tapıldığı bildirilir.

Hadisədən sonra Ermənistan Milli Təhlükəsizlik Xidmətinin (MTX) Xarici İşlər Nazirliyinin binasında axtarış apardığı, kompüter və sənədlərə baxış keçirdiyi qeyd olunur.

“Hraparak” yazır ki, məsələ böyük qalmaqala səbəb ola biləcəyindən həbs xəbəri ictimaiyyətə açıqlanmayıb. Nəşr bildirir ki, adətən diplomatların təyinatı MTX tərəfindən ətraflı yoxlamadan sonra həyata keçirilir. Bu səbəbdən Aleksanyanın işə qəbulunda ya ciddi səhv buraxıldığı, ya da müəyyən hallara bilərəkdən göz yumulduğu ehtimal edilir.

Məlumata görə, hadisəni ört-basdır etmək məqsədilə Aşxen Aleksanyanla bağlı məlumatlar internetdən və açıq mənbələrdən, hətta rəsmi təyinat xəbərlərindən belə silinib.

Rəsmi qurumlar isə hələlik məsələ ilə bağlı açıqlama verməyib.