Avqustun 27-də Şəki Apellyasiya Məhkəməsində siyasi şərhçi Azər Qasımlının işi üzrə proses keçirilib. Hakim Əyyub Kərimovun sədrliyi ilə baş tutan iclas cəmi 3 dəqiqə davam edib və tərəflərin iştirakı olmadan yekunlaşıb.

Azər Qasımlının həyat yoldaşı Samirə Qasımlı sosial şəbəkədə bildirib ki, proses saat 11:02-də başlayıb, 11:05-də bitib:

“Mən prosesə 5 dəqiqə gecikdim. Zala daxil olanda məhkəmə artıq başa çatmışdı. Qarşı tərəf ümumiyyətlə gəlməmişdi.”

Onun sözlərinə görə, əvvəlki iclaslarda da A.Qasımlının şəxsən iştirakına imkan verilməyib, ona görə hüquqi təmsilçiliyi özü həyata keçirib.

Samirə Qasımlı məhkəmə qərarı ilə hələ tanış olmadığını, amma ərinin lehinə nəticə gözləmədiyini deyib. Onunla birgə məhkəmədə iştirak edən vəkil Xalid Bağırov isə “qərarın əvvəlcədən məlum olduğunu” bildirib.

İş A.Qasımlının tanışı Qurbanəli Yusifovun ona olan 20 min dollar borcu ilə bağlıdır. Qasımlı iddia edir ki, Yusifov 2020-ci ildə kriptovalyuta alışı üçün ona pul versə də, öhdəliyini yerinə yetirməyib, sonradan isə ölkəni tərk edib. Mingəçevir Məhkəməsi bu ilin aprelində Qasımlının xeyrinə qərar çıxarıb.

Daha sonra Yusifov daxili işlər nazirinə məktub yazaraq Qasımlını “dövlət əleyhinə fəaliyyət”də ittiham edib. Polis orqanları iddianı sübutsuz hesab edib. Lakin 2024-cü ilin dekabrında iş yenidən açılıb və A.Qasımlı “hədə-qorxu ilə tələb etmə” ittihamı ilə saxlanılıb.

Siyasi şərhçi həbsinin siyasi fəaliyyətinə görə həyata keçirildiyini bildirir.