USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Sevinc Vaqifqızının adı dünya üzrə təqib olunan jurnalistlərin siyahısına salınıb
Beynəlxalq media təşkilatları “AbzasMedia” araşdırmaçı nəşrinin baş redaktoru Sevinc Vaqifqızını dünyanın ən çox təqib olunan və təcili müdafiəyə ehtiyacı olan 10 jurnalistindən biri kimi tanıyıblar. Onun adı Azad Mətbuat Koalisiyasının 3 may – Dünya Mətbuat Azadlığı Günündə dərc etdiyi “10 Most Urgent” siyahısına daxil edilib.
32 nüfuzlu media qurumunun, o cümlədən Azad Avropa/Azadlıq Radiolarının üzv olduğu Koalisiya bildirib ki, bu siyahı jurnalistikanın kriminal fəaliyyət kimi təqdim olunmasına qarşı beynəlxalq diqqəti artırmaq məqsədi daşıyır. Siyahı Jurnalistləri Müdafiə Komitəsi (CPJ), Beynəlxalq Qadın Media Fondu (IWMF) və Sərhədsiz Reportyorlar (RSF) təşkilatlarının əməkdaşlığı ilə hazırlanıb.
Koalisiyanın açıqlamasına görə, Sevinc Vaqifqızı Azərbaycanda 2023-cü ilin noyabrından bəri həbs edilən azı 16 jurnalistdən biridir. Həbslər əsasən korrupsiya halları ilə bağlı araşdırmaları ilə tanınan “AbzasMedia” ətrafında baş verib. Jurnalistlərə qarşı müxtəlif maliyyə ittihamları – qaçaqmalçılıq, vergidən yayınma və s. irəli sürülsə də, Vaqifqızı və həmkarları bu ittihamları rədd edir. Onlar bildirirlər ki, bu həbslər onların dövlət rəsmilərinin sərvətini araşdırmalarının nəticəsidir.
“Bu iş vergidən yayınma və ya saxta sənədlə bağlı deyil. Bu, həqiqətə dözümsüzlüklə bağlıdır,” – deyə Vaqifqızı məhkəmədə bildirib. Qeyd edək ki, ittihamlar əsasında jurnalistlərə 12 ilədək həbs cəzası verilə bilər.
2024-cü ilin sonuna olan məlumata görə, dünyada 361 jurnalist həbsdədir. Bu rəqəm 2023-cü ildə 320 idi. Siyahıya Sevinc Vaqifqızından əlavə, Honq Konq, Myanma, Filippin, Vyetnam, Belarus, Rusiya, Çin, Qırğızıstan və Türkiyədən olan jurnalistlər də daxildir. Onların hamısı irəli sürülən ittihamları rədd edərək, sadəcə həqiqəti yazdıqları üçün cəzalandırıldıqlarını bildirirlər.
Koalisiya bildirir: “Jurnalistika heç bir ölkədə cinayət deyil.”
