Gəncə şəhərində peşə təhsili müəssisəsinin tələbəsi olan 18 yaşlı gəncin ölümü qeydə alınıb.

TƏBİB-in məlumatına görə, 12 yanvar 2026-cı il saat 08:50 radələrində Respublika Təcili və Təxirəsalınmaz Tibbi Yardım Mərkəzinə Gəncə şəhərindən təcili çağırış daxil olub. Hadisə yerinə dərhal təcili tibbi yardım briqadası cəlb edilib.

Tibbi briqada tərəfindən 2008-ci il təvəllüdlü oğlanın həkiməqədər ölüm faktı qeydə alınıb. Ətrafdakıların təkidi ilə o, saat 09:10 radələrində Gəncə Şəhər Birləşmiş Xəstəxanasının nəzdində yerləşən Abbas Səhhət adına xəstəxanaya hospitalizasiya edilib. Həkimlər tərəfindən ölüm faktı təsdiqlənərək aidiyyəti qurumlara təhvil verilib.

Peşə Təhsili üzrə Dövlət Agentliyinin məlumatında bildirilib ki, Bayramov Röyal Vüqar oğlu səhər saatlarında təhsil aldığı Sənaye və Texnologiyalar üzrə Gəncə Dövlət Peşə Təhsil Mərkəzində olarkən qəfil halı pisləşib, huşunu itirərək yıxılıb. Təcili tibbi yardım çağırılsa da, göstərilən müdaxilələr nəticə verməyib.

Digər məlumata əsasən, hadisə Gəncə şəhərinin Məmməd Xələfov küçəsində yerləşən 2 saylı Peşə Liseyinin ərazisində qeydə alınıb. Gəncin meyiti təhsil müəssisəsinin həyətində aşkar edilib.

İlkin ehtimallara görə, 18 yaşlı tələbə ürəktutması nəticəsində vəfat edib. Meyit müayinə olunmaq üçün aidiyyəti üzrə təhvil verilib.

Faktla bağlı Gəncə Şəhər Prokurorluğunda araşdırma aparılır. Hadisənin dəqiq səbəbləri istintaqın nəticələrindən sonra açıqlanacaq.