2025-ci il mayın 5-də Bakı Ağır Cinayətlər Məhkəməsində “Toplum TV işi” üzrə növbəti məhkəmə prosesi keçirilib. Hakim Azər Tağıyevin sədrliyi ilə baş tutan iclasda vəkillər təqsirləndirilən şəxslər barəsində cinayət işinə xitam verilməsi, həbs qətimkan tədbirinin dəyişdirilməsi və axtarış zamanı götürülmüş əşyaların qaytarılması ilə bağlı vəsatətlərlə çıxış ediblər.

Məhkəmədə təqsirləndirilən şəxslərin vəkillərinə sənəd vermək istəyi Penitensiar Xidmətin əməkdaşları tərəfindən əngəllənsə də, sonradan hakim sənədlərin baxışsız təqdim olunmasına icazə verib.

“Demokratik Təşəbbüslər İnstitutu”nun rəhbəri Akif Qurbanovun vəkili Fuad Ağayev bildirib ki, həbsin uzadılması qanunlara zidd şəkildə, sübutlara əsaslanmadan həyata keçirilib. O, həmçinin Qurbanovun evində götürülən ailə üzvlərinə məxsus elektron cihazların geri qaytarılmasını tələb edib.

Ələsgər Məmmədlinin vəkili Fəxrəddin Mehdiyev onun səhhətinin ağır olduğunu və həbsin sağlamlığına ciddi zərər verdiyini qeyd edərək humanist yanaşma tələb edib. Məmmədli çıxışında bildirib ki, artıq 11 gündür qanunsuz şəkildə həbsdə saxlanılır: “Evimin 30 illik arxivi və ailəmə aid şəxsi əşyalar götürülüb. Qaçaqmalçılıq ittihamı əsassızdır”, – deyə o bildirib.

“III Respublika Platforması”nın üzvü Ruslan İzzətli də ittihamları rədd edib və bildirib ki, həqiqətən qaçaqmalçılıq etmiş olsaydı, həbs edilməzdən əvvəl ölkəni tərk edərdi və ya pulları gizlədərdi.

Jurnalist Fərid İsmayılov çıxışında “qaçaqmalçı hökumətdən heç bir xahişim yoxdur” deyərək ittihamların siyasi motivli olduğunu vurğulayıb.

Akif Qurbanov da həmkarlarına dəstək verərək onların sağlamlığına diqqət yetirilməsinin vacibliyini qeyd edib. Jurnalist Müşfiq Cabbar isə gömrükdə saxlanılan avtomobilini götürə bilmədiyini və buna görə cərimə yazıldığını bildirib.

Hakim vəsatətləri təmin etməsə də, ailə üzvlərinə məxsus əşyaların qaytarılması məsələsini nəzarətə götürdüyünü bildirib. Növbəti məhkəmə prosesi 19 may saat 10:00-a təyin edilib.

“Toplum TV işi” üzrə ümumilikdə 10 nəfərə qarşı cinayət işi açılıb. Onlardan səkkizi – Ələsgər Məmmədli, Müşfiq Cabbar, Fərid İsmayılov, Akif Qurbanov, Ruslan İzzətli, Əli Zeynal, Ramil Babayev və İlkin Əmrahov – hazırda həbsdə saxlanılır. Elmir Abbasov barəsində polis nəzarəti, Şahnaz Bəylərqızı barəsində isə ev dustaqlığı qətimkan tədbiri seçilib.

Təqsirləndirilən şəxslər ittihamları rədd edir və siyasi motivli təqibə məruz qaldıqlarını bildirirlər.