Həbsdə olan iqtisadçı Fazil Qasımov artıq 25 gündür aclıq aksiyasını davam etdirir. Ailəsinin Toplum TV-yə verdiyi məlumata görə, Fazil Qasımov bu barədə iyunun 4-də Bakı Apellyasiya Məhkəməsində keçirilən iclas zamanı məlumat verib.

Mayın 21-dən etibarən cərimə kamerasına (karser) salınan iqtisadçının yalnız aclığı dayandıracağı halda karserdən çıxarılacağı bildirilib. Lakin Qasımov bu şərtlə razılaşmayaraq aclığı davam etdirməkdə israrlıdır.

İyunun 4-də keçirilən məhkəmə iclası isə təxirə salınıb. Məhkəməyə hakim Aqil Musayev sədrlik edib. Təxirəsalmanın səbəbi hakimlərdən biri — Cavid Hüseynovun Hakimlərin Seçki Komitəsinin iclasında iştirak etməsi olub. Növbəti məhkəmə prosesi iyunun 17-nə təyin olunub.

Fazil Qasımov mayın 10-dan etibarən aclıq aksiyasına başlayıb və azadlığa buraxılmasını tələb edir. Qasımov ötən il də oxşar məqsədlə 6 ay müddətində aclıq aksiyası keçirmişdi. Ailəsinin bildirdiyinə görə, həmin dövrdə iqtisadçı yalnız su və bal qarışığı qəbul etdiyi üçün bu müddətə dözə bilib.

Xatırladaq ki, Fazil Qasımov 2023-cü ildə Qubad İbadoğlunun işi ilə əlaqəli olaraq Türkiyədə saxlanılaraq Azərbaycana gətirilib. O, bu ilin martında Azərbaycan Cinayət Məcəlləsinin 204.3.1-ci (satış məqsədilə saxta pul və ya valyuta əldə etmə və ya satma – mütəşəkkil dəstə tərəfindən törədildikdə) maddəsi ilə 9 il müddətinə azadlıqdan məhrum edilib. Fazil Qasımov özünü təqsirli bilmir və irəli sürülən ittihamları rədd edir.

Qeyd edək ki, iqtisadçı Qubad İbadoğlu da 2023-cü ilin iyul ayında həbs olunmuşdu. O, eyni maddələrlə — saxta pul və valyuta əldə etmə, saxlama, satma və dini ekstremist materialların yayımı — ittiham olunur. Qubad İbadoğlu ittihamları qəbul etmir. O, ötən ilin aprelində ev dustaqlığına buraxılıb, may ayında isə haqqında polis nəzarəti qətimkan tədbiri seçilib.

Qarşı tərəfin mövqeyini dərc etməyə hazırıq.