Həbsdə olan iqtisadçı Fazil Qasımovun mayın 22-də Bakı Apellyasiya Məhkəməsində keçirilən iclasda verdiyi açıqlamaya görə, o, mayın 21-dən etibarən cərimə kamerasına (karserə) salınıb. Ailəsinin “Toplum TV”yə verdiyi məlumata əsasən, Qasımov 14 gündür aclıq aksiyası keçirir və son vəziyyəti məhkəmədə ictimailəşdirib.

Qasımov iclas zamanı məhkəmə tərkibinə — hakim Aqil Musayevin sədrlik etdiyi heyətə etiraz edib. O, vəkili Nemət Kərimliyə sənəd təqdim etmək istəyərkən ədliyyə işçilərinin müdaxiləsi ilə qarşılaşdığını, sənədin əlindən alındığını və yoxlandığını bildirib. Bu hərəkətə etiraz etdiyini vurğulayıb. Eyni zamanda, apellyasiya şikayətinin məhkəməyə daxil olmadan, aprelin 30-da hakimlərin hazırlıq iclası keçirməsini əsas gətirərək, bu halı qanunsuz sayıb.

Lakin məhkəmə onun etirazının qanunvericiliyə uyğun şəkildə əsaslandırılmadığını bildirib və onu baxılmamış saxlayıb. Qasımov çıxışında həm ibtidai, həm də məhkəmə istintaqı dövründə müdafiə hüququnun pozulduğunu, fevralın 28-də məhkəməyə zorla gətirilərkən qeyri-insani rəftara məruz qaldığını və son sözünün yarımçıq kəsildiyini qeyd edib. Bu səbəbdən işin birinci instansiya məhkəməsinə qaytarılmasını tələb edib.

Vəkil Nemət Kərimli isə apellyasiya məhkəməsində qismən istintaq aparılmaqla baxış keçirilməsi barədə vəsatət qaldırıb. O bildirib ki, bu işlə bağlı adı hallanan Qubad İbadoğlu hələ dindirilməyib və onun iş materialları ayrı icraata çıxarılıb. Vəkil İbadoğlunun Anar Əliyevlə görüşərək ona pul verdiyi iddia olunan kamera görüntülərinin təqdim edilməsini, eləcə də əməliyyat-axtarış tədbirləri ilə bağlı qeydiyyat jurnalının Bakı Şəhər Baş Polis İdarəsindən alınmasını istəyib.

Lakin məhkəmə vəsatəti təmin etməyib. Məhkəmənin növbəti baxış iclası 4 iyun saat 11:00-a təyin edilib.

Xatırladaq ki, Fazil Qasımov 2023-cü ildə Türkiyədə saxlanılaraq Azərbaycana gətirilib və bu il mart ayında Cinayət Məcəlləsinin saxta pul hazırlama və satma ittihamı ilə 9 il müddətinə azadlıqdan məhrum edilib. O, ittihamları qəbul etmir. Onun adı Qubad İbadoğlunun işi ilə də hallanır.

Qubad İbadoğlu isə 2023-cü ilin iyulunda həbs olunub və barəsində bir neçə ittiham irəli sürülüb. O da ittihamları rədd edir. 2024-cü ilin aprelində ev dustaqlığına buraxılan İbadoğlunun barəsindəki qətimkan tədbiri may ayında dəyişdirilərək polis nəzarəti ilə əvəz olunub.

Hər iki şəxsin “FETÖ” ilə əlaqədə ittiham olunur.