[
Milli Məclisin deputatı Naqif Həmzəyev noyabrın 19-da 2026-cı il üçün dövlət büdcəsi layihəsinin müzakirəsi zamanı çıxışı ilə diqqət çəkib. Deputat bildirib ki, regionlarda yaşayan gənclərin Bakı şəhərinə axınının qarşısının alınması üçün əlavə tədbirlər görülməlidir.

Həmzəyev deyib ki, kəndlərdən şəhərlərə köç müəyyən qədər anlaşılan proses olsa da, şəhərlərdən Bakıya miqrasiya narahatlıq doğurur:

“Bəlkə kəndlərdən şəhərlərə köçü başa düşmək olar. Amma şəhərlərdən Bakıya köç bizi düşündürməlidir.”

Deputat əlavə edib ki, təmsil etdiyi Gəncə şəhərində yeni iş yerlərinin yaradılması, sahibkarlar üçün əlavə imkanların açılması prioritet olmalıdır.

Vəkil Aqil Layicdən sərt reaksiya

Deputatın bu fikirləri sosial şəbəkələrdə geniş tənqid olunub. Ən sərt reaksiyalardan biri vəkil Aqil Layicdən gəlib. O, sosial şəbəkə hesabında Həmzəyevin fikirlərinə kəskin şəkildə etiraz edib:

“Sən də get Gəncədə uşaqlıq hobbin olan keçi qulağını dişlə…”

Vəkilin bu ifadəsi qısa müddətdə geniş müzakirə olunub və deputatın açıqlamalarına qarşı artan narazılığın nümunəsi kimi qiymətləndirilir.

Hazırda məsələ sosial mediada geniş rezonans yaratmaqdadır.