Noyabrın 19-da Bakı Ağır Cinayətlər Məhkəməsində Siyasi Menecment İnstitutunun həbsdə olan direktoru Azər Qasımlının işi üzrə növbəti iclas keçirilib. Proses saat 17:00-a təyin edilsə də, gec başladığından cəmi yarım saat davam edib.

Bu dəfə məhkəmədə “zərərçəkən” Qurbanəli Yusifovun anası Səlminə Yusifova şahid qismində dindirilib. O, ifadəsində oğlunun Azər Qasımlıya borcu olduğunu etiraf etdiyini deyib:

“Oğlum dedi ki, A. Qasımlıya borcu var, amma qaytarmayacaq. Mingəçevir məhkəməsinin qərarından sonra həyat yoldaşım dedi ki, evi bizə satdıracaqlar.”

S. Yusifova qeyd edib ki, A. Qasımlını yalnız məhkəmə proseslərindən tanıyır və oğlunun 45 min dollar borcunun olduğunu məhz Mingəçevir məhkəməsində öyrənib. O, ibtidai istintaqdakı ifadəsini təsdiqləsə də, təhdid məsələsində ziddiyyət yaranıb. Hakim diqqətə çatdırıb ki, şahid əvvəlki ifadəsində A. Qasımlının oğlunu təhdid etdiyini demişdi. Yusifova isə məhkəmədə bunun həyat yoldaşından eşitdiyi söz-söhbət olduğunu bildirib. Hakim buna belə reaksiya verib:

“Elə bil təhdid sözünün mənasını bilmir.”

Azər Qasımlının vəkili Rövşanə Rəhimli şahidin ifadəsindəki zaman uyğunsuzluqlarına diqqət çəkib. Yusifova bu borc barədə 2024-cü ilin aprelində bildiyini desə də, istintaqda bunu 2023-cü ilin payızında oğlundan eşitdiyini deyib.

Azər Qasımlı isə şahidə birbaşa sual verib:
“Mənim sizin oğlunuzu təhdid etdiyimi öz gözlərinizlə görmüsünüzmü?”
Şahid “görməmişəm” cavabı verib.

Bununla şahidlərin dindirilməsi mərhələsi başa çatıb. Vəkil Rövşanə Rəhimli bildirib ki, indiyədək dindirilən heç bir şahid təhdidi görmədiyini deyib və onların ifadələrinin sübutlar siyahısından çıxarılması üçün vəsatət vermək istəsə də, hakim vaxt çatmadığını bildirərək vəsatəti qəbul etməyib.

Növbəti proses dekabrın 10-na təyin edilib.

İttiham və müdafiə mövqeyi

Azər Qasımlı ötən ilin dekabrında həbs olunub və Cinayət Məcəlləsinin 182.2.3-cü maddəsi (hədə-qorxu ilə tələb etmə, zor tətbiqi ilə) ilə ittiham olunur. O, ittihamları rədd edir və həbsinin siyasi fəaliyyəti ilə bağlı olduğunu bildirir.

A. Qasımlının həyat yoldaşı Samirə Qasımlı daha əvvəl açıqlamışdı ki, Qurbanəli Yusifov siyasətçiyə məxsus kriptovalyuta hesabını idarə edib və ona verilmiş 20 min dolların bir hissəsinə dair öhdəliklərini yerinə yetirməyib. 2024-cü ilin aprelində Mingəçevir Məhkəməsi Qasımlının xeyrinə qərar verəndən sonra Yusifov ölkəni tərk edib.

S. Qasımlının sözlərinə görə, bundan sonra Yusifov DİN-ə müraciət göndərərək A. Qasımlını siyasi motivli fəaliyyətə cəlb etmək və imtina etdikdə təhdid etməkdə suçlayıb. İlk araşdırmada sübut tapılmadığı üçün işə xitam verilsə də, daha sonra yenidən açılıb və nəticədə Qasımlı həbs edilib.