Azərbaycan Respublikası müdafiə nazirinin müavini, Quru Qoşunların komandanı, Xüsusi Təyinatlı Qüvvələrin sabiq komandanı, Vətən Müharibəsi Qəhrəmanı general-polkovnik Hikmət Mirzəyev bu gün əfsanəvi kəşfiyyatçı, “Kəşfiyyatın Mixaylosu” kimi tanınan şəhid kapitan Mühüd Orucovun atası Qurban Orucovu qəbul edib.

Görüş zamanı general-polkovnik Hikmət Mirzəyev Mühüd Orucovun Xüsusi Təyinatlı Qüvvələrdəki misilsiz xidmətlərini yüksək qiymətləndirib:

Mühüd əvəzolunmaz kəşfiyyatçı idi. O, həm zabit, həm insan kimi fərqlənirdi. Bütün tapşırıqları qüsursuz yerinə yetirirdi, Vətəni özündən çox sevirdi. O, hərbçi doğulmuşdu. Vətən Müharibəsində Mühüdün yetirdiyi hərbiçilər böyük şücaətlər göstərdilər. Mühüd kimi oğul böyütdüyünüzə görə Sizə təşəkkür edirəm. O, hər zaman mənim yadımdadır, qəlbimdədir. Yaxın günlərdə onun məzarını ziyarət edəcəyəm.”

Səmimi söhbət zamanı şəhid atası Qurban Orucov da oğlunun general Hikmət Mirzəyevə böyük hörmət bəslədiyini bildirib:

“Mühüd Sizinlə fəxr edirdi. Evə gələndə anası soruşardı: ‘Komandirin necə adamdır?’ Mühüd isə fəxrlə: ‘Ana, məndən nigaran qalma, komandirim qızıl kimi adamdır’, – deyərdi.”

Görüşün sonunda Hikmət Mirzəyev Qurban Orucovla xatirə fotosu çəkdirib.