Bu gün, 20 noyabr, Azərbaycanda Ağdam Şəhəri Günü qeyd olunur. Ağdamın erməni işğalından azad edilməsindən 5 il ötür.

Ağdam şəhəri və rayon ərazisi Azərbaycanın Vətən müharibəsində qazandığı qələbənin nəticəsi olaraq bir güllə atılmadan azad edilib. Prezident İlham Əliyevin, Ermənistan Baş naziri Nikol Paşinyanın və Rusiya Prezidenti Vladimir Putinin 2020-ci il 10 noyabr tarixli üçtərəfli bəyanatına əsasən, Ağdam 20 noyabr 2020-ci ildə Azərbaycana qaytarılıb.

Ağdamın azad edilməsinə aparan yol

2020-ci ilin 27 sentyabrında başlayan əks-hücum əməliyyatları zamanı Azərbaycan Ordusu uzun illər işğalda qalan torpaqlarını kəndbəkənd azad edib. Ağdam isə düşmən tərəfindən güclü minalanması və ciddi istehkamların mövcudluğu səbəbindən birbaşa hərbi əməliyyata cəlb olunmayıb. Ordumuz bu istiqamətdə qeyri-zəruri itkilərin qarşısını almaq üçün taktiki yanaşma seçərək digər bölgələrdə irəliləyib.

Azərbaycan Silahlı Qüvvələrinin uğurlu əməliyyatları nəticəsində Ermənistan ordusunun Ağdamdakı bölmələri yarımmühasirəyə düşüb və nəticədə Ermənistan kapitulyasiya aktını imzalamağa məcbur qalıb.

Ağdamın işğal illəri

Ağdam 1993-cü il iyulun 23-də erməni silahlı qüvvələri tərəfindən işğal olunmuşdu. İşğal nəticəsində:
• Rayonun 77,4%-i — 846,8 kv.km ərazi,
• 1 şəhər və 80 kənd
• Təsərrüfat və sosial obyektlərin böyük hissəsi
• 17 məsciddən 14-ü
• 108 məktəbin 74-ü
• 129 səhiyyə obyektinin 105-i
• 271 mədəniyyət evinin 199-u

tamamilə dağıdılmış və ya talan edilmişdi.

Ağdam döyüşlərində Azərbaycan 6 min şəhid verib. Onlardan 16 nəfəri Milli Qəhrəman adına layiq görülüb.

Ağdam Şəhəri Gününün təsis edilməsi

Prezident İlham Əliyevin 31 iyul 2023-cü il tarixli sərəncamı ilə 20 noyabr hər il Ağdam Şəhəri Günü kimi qeyd olunur.

Bu gün Ağdamda geniş bərpa-quruculuq işləri aparılır, doğma yurda Böyük Qayıdış davam edir və rayon yenidən mədəni-sosial həyatına qovuşur.