USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Bakı Ağac Emalı” ASC-də baş verən partlayış işi üzrə hökm elan olundu – 10 nəfərin ölümü ilə bağlı 6 il həbs
Bakıda 10 nəfərin ölümünə, 23 nəfərin isə xəsarət almasına səbəb olmuş faciəvi partlayış işi üzrə məhkəmə prosesi başa çatıb.
Bu gün, 19 noyabrda Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən iclasda “Bakı Ağac Emalı” ASC-nin ərazisində yerləşən mebel emalatxanasında baş vermiş partlayışla bağlı təqsirləndirilən şəxslərə hökm oxunub.
Məhkəmənin qərarına əsasən, Tağı İbrahimov və Toğrul Rzayev 6 il müddətinə azadlıqdan məhrum edilib. Hər iki şəxs ittihamları qəbul etməsə də, məhkəmə onları təqsirli bilərək cəza təyin edib.
Proses zamanı məlum olmuşdu ki, zərərçəkmişlərin bir qismi ilə kompensasiya müqabilində barışıq əldə olunub. Lakin kompensasiyanı qəbul etməyən zərərçəkmişlər də var idi.
Xatırladaq ki, 2023-cü il yanvarın 15-də Binəqədi rayonunda “Bakı Ağac Emalı” ASC-nin ərazisində yerləşən mebel emalatxanalarında güclü partlayış və yanğın baş vermiş, nəticədə 10 nəfər həlak olmuş, 23 nəfər müxtəlif dərəcəli xəsarətlər almışdı.
İstintaq materiallarına görə, ASC-nin faktiki sahibi kimi göstərilən Tağı İbrahimov Cinayət Məcəlləsinin 213.3 (xüsusilə külli miqdarda vergidən yayınma) və 225.3 (yanğın təhlükəsizliyi qaydalarının pozulması ağır nəticələrə səbəb olduqda) maddələri ilə ittiham olunub. İnzibati-təsərrüfat işlərinə cavabdeh olduğu bildirilən Toğrul Rzayev isə 225.3-cü maddə ilə məsuliyyətə cəlb edilib.
Qeyd edək ki, Tağı İbrahimov Diasporla İş üzrə Dövlət Komitəsinin keçmiş sədri Nazim İbrahimovun qardaşıdır.
