Bu gün – 17 noyabr Azərbaycanda Milli Dirçəliş Günü kimi qeyd olunur.

Milli Dirçəliş Günü Azərbaycan xalqının azadlıq və müstəqillik uğrunda apardığı mübarizənin əsas mərhələlərindən biridir və ölkənin dövlət müstəqilliyinin bərpa olunmasına gedən yolda mühüm tarixi rol oynayıb.

1960-cı illərdən formalaşmağa başlayan milli özünüdərk və dirçəliş ideyası sonradan Ümummilli Lider Heydər Əliyevin uzaqgörən siyasəti ilə güclənərək dönməz bir prosesə çevrildi. XX əsrin sonlarında Sovet İttifaqında baş verən siyasi və ideoloji böhranlar, ermənilərin Qarabağda torpaqlarımıza qarşı ərazi iddialarını irəli sürməsi Azərbaycan xalqının milli ruhunu daha da alovlandırdı. 1988-ci ildən başlayaraq ölkədə yüz minlərlə insanın qatıldığı milli istiqlal hərəkatı geniş vüsət aldı.

1990-cı il noyabrın 17-də Heydər Əliyevin sədrliyi ilə Naxçıvan Ali Sovetinin tarixi sessiyasında Azərbaycan Xalq Cümhuriyyətinin üçrəngli bayrağı dövlət rəmzi kimi bərpa edildi. Bu, Azərbaycanın müstəqilliyə gedən yolunda dönüş nöqtəsi oldu və milli dirçəlişin rəsmi simvoluna çevrildi.

Müstəqillik illərində Azərbaycan böyük tərəqqiyə nail oldu, regionun lider dövləti kimi mövqeyini möhkəmləndirdi, qlobal layihələrin mühüm iştirakçısına çevrildi. 2020-ci ildə 44 günlük Vətən müharibəsində Qələbə və 2023-cü ilin sentyabrında aparılan lokal antiterror tədbirləri nəticəsində ölkəmizin suverenliyi tam bərpa edildi.

Bu gün Milli Dirçəliş Günü Azərbaycan xalqının birlik, azadlıq iradəsi və müstəqillik əzminin təcəssümüdür.