Xaricdə fəaliyyət göstərən “Azad Söz” və “Made in Azerbaijan” sosial media səhifələri fəaliyyətini dayandırdığını elan edib. Bu barədə platformanın simalarından olan Tural Sadıqlı və Məhəmməd Mirzəli açıqlama yayıb.

Sadıqlı bildirib ki, fəaliyyətin davam etdirilməsi üçün maliyyə dəstəyinə ehtiyac yaranıb. Diqqətçəkən məqam isə odur ki, Azərbaycan hakimiyyətinə qarşı sərt tənqidi çıxışları ilə tanınan bu qrup illər ərzində heç vaxt maliyyə çatışmazlığı barədə məlumat verməmişdi.

Hadisə, Ramiz Mehdiyev barəsində oktyabr ayında seçilən ev həbsi qərarından sonra müzakirəyə çıxarılan iddialarla əlaqələndirilir. Həmin vaxt Mehdiyevin və ətrafının xaricdə fəaliyyət göstərən bəzi müxalif qrupları gizli maliyyələşdirdiyi ehtimalı irəli sürülmüşdü.

Mehdiyev barəsində qərardan az sonra bəzi diqqətçəkən proseslər yaşanıb:
• Qabil Məmmədovun fəallığının qəfil azalması, bir müddət ictimaiyyət qarşısından çəkilməsi;
• İndi isə Tural Sadıqlının “Azad Söz” və Məhəmməd Mirzəlinin “Made in Azerbaijan” -nın fəaliyyətini dayandırması.

Bu ardıcıllıq bəziləri tərəfindən təsadüf kimi qiymətləndirilsə də, digərləri bunu yayılan iddiaların dolayı təsdiqi hesab edir.

Bununla belə, sözügedən iddialar hazırda yalnız ehtimal xarakteri daşıyır. Məsələyə dair əsas sualların cavabı isə ehtimal ki, davam edən istintaq prosesində aydınlaşacaq.